June 29; 2022; Hman khat daih sarang (Single Use Plastics) te chu sawrkar laipui chuan July ni 1, 2022 atangin a khap tawh dawn a, hetihlai hian Myanmar atanga Mizoram a bungrua (polythene/plastic) lo lut a tam a, chu chu buaipui tham a tling leh dawn nia thudawn a ni.

Hman khat daih sarang hi Aizawl Municipal Corporation (AMC) huam chhungah pawh khap a ni ve dawn a, kawl, zuar leh hmang luite chu 'The Mizoram Municipalities Act, 2007' leh 'Plastic Waste Management By - Laws, 2019' hmanga hrem theih a ni ang.

July ni 1 atanga Hman khat daih sarang khap tur chungchangah hian ZALEN zawhna chhangin, Mizoram Pollution Control Board (MPCB) a member secretary C Lalduhawma chuan, khap tawh hmang/zuar luite chu man theih an ni dawn tih sawiin, authority hrang hrang ten an huamchhung theuh ah hma an lak tur thu leh action pawh an lak theih dawn thu a sawi.     

Sawrkar office hrang hrangah pawh hmalak deuh vek a nih tawh thu te, khapna kengkawhtu tur 'task force' din te pawh office tam takah an awm tawh thu sawiin, MPCB member secretary chuan, central sawrkarin siam chhuah a khap dawn thu leh industry zawng zawng a control tur thu a sawi.

India ramah chuan khap vek a nih dawn thu te, hetihlai hian Mizoramah chuan Myanmar atanga lo lut a tam thu leh chu chu buaipui tham a nih leh a rinawm thu MPCB member secretary chuan a sawi bawk.

Hetihlai hian July ni 1, 2022 atangin khap ni dawn mah se, vawiin thlengin Aizawl khawpui chhung dawr hrang hrangah zuar an la tam hle a, ZALEN in dawr thenkhat a biakte chuan a theih ang anga inhmakhua a an intihralh rualin, stock mai bakah, kawng laka an thil chah lo thleng mai turte pawh an la neih thu te an sawi. Hman khat daih sarang/plastic thlakna turah harsatna a awm an rin thu te, a awm a nih pawhin a man a to deuh an rin thu te an sawi bawk.

:July ni 1, 2022 ATANGA KHAP TURTE :-
1. Earbud with plastic stick (beng hawlhna)
2. Plastic sticks for ballon
3. Plastic flag
4. Candy stick
5. Ice cream stick
6. Polystyrene (thermocol) for decoration
7. Plate & tray (thleng)
8. Cup & glass (no)
9. Spoon (thirfian)
10. Fork (thirkut)
11. Knive (chemte)
12. Straw (thil inna/hipna)
13. Wrapping/packing film around sweet box (thil funna)
14. Invitation card
15. Cigarette packet
16. Plastic/PVC banner (micron 100 aia pan)
17. Stirrer (thil chawhna)