Aizawl July 21, 2024 : Hman khat daih sarang (single use plastic) khap mekin zawm a hlawh chho mek zel a, hetihlai hian dawr leh bazara leklam nasat, polythene (carry bag) chu he khapna dana harsatna siamtu lian ber a la ni zel a, plastic zinga leklam uar tak tui bottle chu khap zingah hian a tel lo.

Mizoram Pollution Control Board (MPCB) Member Secretary C. Lalduhoma’n ZALEN a hrilh danin, hman khat daih sarang khap kalpui mek chu a hlawhtling thawkhat mekah ngaih a nih laiin, bazar leh dawr velah polythene an la leklam nasa a, chungte chu khawchhak lam atanga lut a ni ber a, India ram hmun dang atanga lut a awm meuh tawh lo.

MPCB member secretary chuan polythene pan tê tê hmang an la tam tih sawiin, “Hei hi kan ram tibawlhlawhtu ber pawh a ni, a lo luhna hi custom nena tanghoa hmalak ngai a ni a, chutihrual chuan mipuiah pawh inzirtirna neih pawh a la tul zel niin a lang,” a ti bawk. 

July 1, 2022 atang khan Mizoram pumah Plastic Waste Management (Amendment) Rules, 2021 hmangin single use plastic hman khap a lo ni tawh a, sarang hman nawn loh chite chu sawrkar laipui thu angin India ram pumah khap a ni a, chumi ang chuan Mizoramah pawh khap a ni.

Hman khat daih sarang kawl, zuar leh hmang luite chu Plastic Waste Management Rules hmangin hrem theih an ni a, Aizawl bikah chuan The Mizoram Municipalities Act, 2007 hmangin hrem theih a ni bawk.

MPCB hotute sawi danin sarang pan chi hman khapna dan kengkawhtu tur hrang hrang an awm a, chung zingah chuan UDPA department, Aizawl Municipal Corporation (AMC), MPCB leh district administration-te an tel.

Sawrkar laipui chuan Plastic Waste Management Rules, 2016 hmangin a khap a, chumi ang chuan Aizawl AMC pawhin micron 50 aia pan sarang khapna thupek August 1, 2019 khan chhuahin, Aizawl khawpuiah sarang pan chi hman khap a lo ni tawh.

Sarang khapna dan chu kum 2021-ah tihdanglam hret niin Plastic Waste Management (Amendment) Rules, 2021 siam a ni a, sarang ip micron 75 aia pan hman, kawl leh zawrh khap a ni a, chumi bawhzui chuan AMC chuan December 6, 2021 khan thupek a chhuah a. Hemi hnu hian sarang ip (carry bag) 120 microns aia pante chu December 31, 2022 atangin khap leh a ni bawk.