Aizawl: India ramin zalenna a hmuh kum 75-na lawmna kalzel “Azadi Ka Amrit Mahotsav” puala Department of Mizo, Pachhunga University College leh Social Welfare & Tribal Affairs Department, Government of Mizoram tangkawpin an buatsaih ni hnih awh tur “Seminar on Vai Len leh Mizote : Hman pasalthate Hnuhma” (Revisiting Lushai/Chin Expedition : Role of Mizo Freedom Fighters) chu Home Minister Lalchamliana’n a hawng.

Seminar hawnna inkhawm Zirtawpni kaltaa PUC Seminar Hall-a neihah thu sawiin Home Minister Lalchamliana chuan, "Zalenna sual hian a man kan pe tam em em mai a, vai len hre pha lo mah ila rambuai (Mizoram) kan hre pha ve a, nunna hlu tak tak kan chan bakah in leh lo kan chan a, mihring zahawmna nasa taka tihbawrhban a ni a, a tuartute thinlungah ser nung lian tak tak hnutchhiah a ni thin a, zalenna suala kan mihuaisente inpekna hi thangthar lo awm zel turte pawhin kan hriat reng mai bakah kan inhrilh thar fo a pawimawh a ni," a ti. Lalchamliana chuan tunlai khawvel thlirin ram leh hnam humhalh tura tharum thawh a rem lohna tam tak a awm tawh avangin kawng dang kan dap a ngai a, a pawimawh ber zinga pakhat chu mahni intodelh a, midang rinchhan lova kan dinchhuah hi a ni a ti bawk.

Khualzahawm Human Resources Development Board Vice-Chairman L. Thangmawia pawhin thu sawiin, "Vai len tum hnih kan tawk a, tun thlenga min nghawng dan hi a sawihnawm duh tan sawi tur a tamin a rinawm a, chutih lai erawh chuan Mizote Kristian sakhua min rawn petu a nihna hi a ropui a. Kristian sakhua min din sak mai bakah hmun hrang hranga pem darh mizote rorelna huang khatah min chhungkhawmin Mizo hnam min din saka, kan duhthusamin la famkim rih lo mahse kan thang zel ang a, Pathianin hnam khata min din chhoh merknaah hian kan chian vek hunah midangte chungah kan la leng ngei dawn a ni," a ti.

Seminar thupui sawi hawngtu Prof. Jangkhongam Dougel, Mizoram University chuan Vai len thawh khatna leh thawh hnihna in Zo hnahthlak hnam hrang hrangte a nghawng dan chanchin a zirchianna a sawifiah a, Mizote chanchin hi khawvel hriatah sapho leh Vai hovin an ziak nasa a, Mizote ziak zirchianna mumal leh chipchiar hmuh tur kan nei mumal lo hi a pawi a tih thu sawiin, keimahni chanchin hi kan zirchian a kan ziah ngei a tul tawh a ni, tiin Mizo subject-a zirlaite leh thiamna bik neite a cho a, mahni subject ni lo subject dang fumfe si lova thlur tel vak ai chuan mahni subject bikah hian a tawp thleng rat thei tura kan inzir a ngai a, Ph.D degree neih a dawhkana thut chhunzawm duhtawk mai lovin kan thiamnate hi field-a luhchilh pui ngam a tul tawh a, Mizote khawvelin min hmuh dan pawh kan her dik zel thei dawn a ni a ti.