Aizawl June 12, 2023: Vawiin khan Social Welfare & Tribal Affairs Minister Er. Lalrinawma chuan Hmeichhia te dinhmun chawikanna tur leh venhimnaa tur programme Mission Shakti khuhhawnna a nei.

ATI Auditorium Aizawl-ah hun hman naah Social Welfare Minister Er.Lalrinawma chuan hmeichhiate dinhmun chawikang turin hian a hmei a pa an pawimawh a ni, a ti a; an chanvo chang thei tur a dawmkan leh rahbi siamsak chu tih makmawh a nih thu a sawi.

Minister chuan sawrkar laipuiin hmeichhe dinhmun a ngaih pawimawh avangin scheme tha tak tak kalpui mek a nih thu leh Mission Shakti pawh hian hmeichhiaten hleilenna an tawrh na lakah nasa takin venhimna leh chhawmdawlna a pe dawn a ni a ti. He program hlawhtlinna atan hian Department hruaitu leh Staff-te chu theihtawp chhuah turin a fuih bawk.

Women and Child Development Director Zoramthangi Chhangte-in Mission Shakti pawimawhna leh Mizoram chhunga kalpui dan tur te tarlanna a nei a, hun a hman zawh hian tunhnaia HSSLC result chhuaka hmeichhe topper-te lawmpuina thuziak hlanna hun hman a ni bawk.

Mission Shakti hnuaiah hian State Hub for Empowerment of Women (SHEW), State level-ah awm in, District tinah District Hub for Empowerment of Women (DHEW) te an awm bawk a. Tin, Universal Women Helpline (WHL), hmeichhia harsatna tawkte`n phone hmanga an harsatna an thlen theihna turin englai pawhin an duty a, anni hian an hnena harsatna thlentute, an mamawhna zawn zela tanpui thei turin an inhawng a ni. Heng bakah hian District tinah One Stop Centre (OSC), hmeichhia tanpui ngaite leh harsatna tawkte tan tluk luhna tur leh Shakti Sadan (Swadhar Greh Home), hmeichhe baihvai leh hleihlenna tawkte inhumhimna turin englai pawhin an inhawng reng a ni. Hmeichhia leh naupang tanpui ngaite tan Phone number 181 leh 1098 ah te engtik lai pawhin phone theih reng a ni bawk.