Aizawl June 11, 2023: Mizorama hmeichhe harsatna tawk tanpuina ngen zingah pawmlai nei tam berin heng zingah hian kum 21 atanga 40 inkar chu a tuartu tam ber an ni.

ZALEN-in hmeichhe harsatna tawkte tanpui tur leh an harsatnate an thlenna tura din, Women Helpline Mizoram thawktute hnen atanga thu a dawn danin Mizorama hna an thawh tan tirh, July, 2016 atanga April, 2023 inkar chhung khan puihna dila bia (no. of calls) 14,010 an dawng tawh a, heng zinga 8,179 chu a tuartu ten an biakna niin an aiawha betu 5,831 an awm tawh bawk. 

Women Helpline Mizoram-in case an dawn zinga 59.52% hi inchhungkhura hleilenna (domestic violence/ abuse) tuartu an ni a, a dang 40.48% hi non-domestic violence a ni.

Inchhungkhura hleilenna (domestic violence) tuarte hi a tlangpuiin kut inthlak piah lamah tawngkaa invau, mipat hmeichhiatna rawngkai, ruihhlo leh inrikrapna (multiple abuse) te a ni tlangpui a. Non-domestic violence-ah hian media chi hrang hrang hmanga tihbuai, inchhaih nawmnah, tihduhdah, tihhmingchhiat leh a dang te a tel a ni.

Hmeichhe harsatna tawk zingah hian pasal nei lai tam berin 41% lai an tling a. Kum bithliahah kum 21 atanga 40 inkar tam berin case zawng zawng atanga 62% an tling bawk a. Harsatna thlentu (perpatrator) zingah an pasalte tam berin 38% an tling a ni. 

Zawhna chhangin Women Helpline Mizoram thawk te chuan ngun taka an zir hnuah hmeichhe chunga harsatna thlentu te zingah ruihhlo, a bikin zu in mi an tam hle tih an sawi a. Damdawi leh ruihhlo danga inhnamhawih pawh engemaw zat awm tho mahse ‘Zu’ a ni tlangpui tih an sawi a, harhfim reng chunga hmeichhe chunga hleilenna thlen hrehlo enge maw zat an awm tih an sawi.

Physical abuse tuartu zinga thalai (20-40yrs) an tam chhan zawhna chhangin, "Mipa (kan clientte pasal) te zingah ruihhlo a bikin zu hmangsual an tam vang a ni ber a. Pasal la neilote-ah pawh, nuta emaw an pa te emaw in khata an chenpui zu-in mi leh kut ram deuh an awm vang a ni fo bawk a. Ngaihzawng te leh Live-In Partner (man leh mual inhlan lova chengdun) te atanga hleilenna tuar an awm fo bawk a ni," an ti. Hei bakah hian kum 20-40 inkarah hian nupui pasal a insiam, nupa nihna kawnga mawhphurhna hrethiam tawklo leh rilru puiting tawklo an tam vangte pawh a ni thei tih an sawi bawk.

WHL pantu zingah Aizawl khawpui chhung an tam ber tih sawiin WHL thawk te chuan, "Kan case hmun thum a thena hmun hnih (2/3) hi Aizawl atanga kan dawn a ni a. A chhan nia lang chu Mizoram mihring cheng zatve aia tam hiAizawla cheng kan ni a. Urban area a population sang lutuk hian Aizawl khawpui chhung atanga case kan dawn tam chhan niin kan hria a ni," an ti a. Hleilenna tuar zingah dinhmun hnuaihnung zawk te an tam bik chuanglo tih sawiin, "Hmeichhia ten mipa kut an tawrh chhan hi hmeichhe zir san lam emaw, a quality emaw, a status vang niin a lang lo a. Mi challang tak tak leh lehkha zir sang tak tak zingah pawh hleilenna tuar enge maw zat an awm tho a ni," an ti bawk.

Women Helpline hi hmeichhia hleilenna tawktute chauh ni lovin hmeichhia kawng hrang hranga harsatna tawkte zawng zawng in engtik lai pawha an biakpawh theih turin darkar 24 chhung an in hawng reng a. Harsatna nei tan phone no. 181 ah a thlawn a (toll free) biak pawh theih an ni a, an office number 0389-2311271 ah pawh hian engtik hunah pawh biakpawh theih reng an ni. Women Helpline Mizoram hi July ni 14,2016 khan khatih laia SWD Minister PC Lalthanliana chuan a hawng a ni.