August 23, 2022; Mizoramah hmeichhe inzuar, 'Female Sex Worker' (FSW) 787 leh mipat pui kawp thin, 'Men having Sex with Men' (MSM) 765 chhin chhiah an awm a. FSW leh MSM te hi chhinchhiah loh an tam zawk tur a ngaih a ni.

Health Department in tunhnaia a tihchhuah e-Book 2021-22 a tarlan a nih danin, Mizoram State Aids Control Society (MSACS) ah FSW leh MSM te hi chhinchhiah an ni a. ZALEN thudawn danin, chhinchhiah (in register) chin te chu counseling te pek thin an nih bakah, HIV atanga himna tur inzirtirna te pek thin an ni. Heng te bakah hian thla 6 danah HIV test tihsak thin an ni bawk a, invenna te pek an ni thin bawk. 

Hmeichhe inzuar leh mipat pui kawp thin MSACS in a chhinchhiah te bak midang an tam hle turah ngaih a ni a, MSACS a in register te aiin, in register lo an tam zawk rin a ni.

MSACS chhinchhiah danin, drugs a inchiu thin (IDU) chhin chhiah mi 11,443 an awm mek a, kum liamta 2021-22 chhung khan syringes 14,15,950 sem chhuah a ni. March ni 31, 2022 thleng khan Mizoramah HIV positive hmuhchhuah mi 20,542 an awm.