Aizawl August 19, 2024 : Vawiin hian Mizo Hnam Runah Mizo National Women Front (MNWF) pualin chhung inkhawm neih a ni a. He hun hi B Lalawmpuii, Vice President, AMC Executive Corporator-in a kaihruai a, Zakapa Award pawh lo dawng tawh Dr. Lalrinawmi Ralte chuan Mizo hmeichhia te dinhmun chawikang turin sawrkar, kohhran leh khawtlang an pawimawh thu a sawi.

Dr Lalrinawmi Ralte, Tluangnuam chuan Mizo hmeichhiate dinhmun chawikang zel turin sawrkar, kohhran leh society tanrual a ngaih thu a sawi a. Tun dinhmunah chuan an tangrual tha tawk lo nia a lan thu a sawi bawk a ni. "Mizo hmeichhiate dinhmun chawikang tura sawrkar, kohhran leh khawtlang a tanrual theih nan hmahruaitu an awm a ngai a ni," a ti.

Dr Lalrinawmi Ralte chuan, ram, kohhran leh khawtlang inrelbawlnaa thutlukna siamtuah hmeichhia an awm ve a tul tih a sawi a. "Hmeichhiate infuih tawn ila, tihrual ngai te tih rualin hmalam i pan ang u," a ti a. Ram inrelbawlnaah hmeichhia an tel ve zauh zauh thin tih a sawi a, "Kan la lut tam tawk lo a, dinhmun pawimawh kan chelh tam ve a ngai a ni," a ti bawk.

Dr Lalrinawmi chuan, "Pathianin mamawhtute tanpui turin min ti a, raltlante hi theih ang angin kan pui tur a ni. Raltlan harsa tak takte la pui lo kan awm a nih chuan kan tih tur kan la ti lo a ni," a ti a. Dr Rinawmi chuan hmeichhiate inzir fing zel a, hmalam pan zel a ngai tih sawiin, "Ram, Kohhran leh vantlang inrelbawlnaa tih puisui a, tihmasawn turin ram inrelbawlnaah kan tel tam ve zel a ngai a ni," a ti bawk.