Aizawl: Health department thawktuten ZALEN an hrilh danin private hospital Covid 19 test theihna 4 - Synod hospital Durtlang, Trinity hospital, BN hospital, Ebenezer hospital te an ni a. Hei bakah hian Bawngkawnah (kiosk) leh R. Dengthuama Hall -ah te test theih a ni leh bawk a. Hetih lai hian vantlangin Covid-19 test theihna hmun tura sawrkarin license a pek private hospital-te chuan an damlote bak an test thei hrih lo tlangpui niin thudawn a ni a, a then chuan vantlang test thei turin hma an la bawk.

Ebenezer Hospital sawi danin an damlo enkawl chauh RagT hmangin an test thei a, pawn lam mi an test theih loh thu an sawi a.

BN Hospital pawhin RagT test kit an ngah loh avangin pawn lam mi an test thei lo niin thudawn a ni. Trinity Hospital chuan Specimen Referral Form (SRF) leh test kit chalh belh an la nghah thu sawiin pawnlam mi test tur chuan kaihhnawih a tam a, hun bik hawn an tum niin ZALEN a hrilh thung.

Synod Hospital Durtlang a doctor pakhat chuan, “A?hun kan sawi thei mai lo nangin vantlang test thei tur hian kan hmunhmate singsain kan inpuahchah mek a, test kit supply lam hi kawng a pin avangin duh ang kan chah thei lo a, thlawhnaten tlem azawng a lo thleng a. Tunah hrih chuan kan damlo test ngaite kan test hrih a, hma erawh kan la zel,” tiin ZALEN a hrilh bawk.

R.Dengthuama Hall-ah zing 9.00AM atangin test hi a mamawh zual tan pan theih niin a tul chuan 9 PM pawh an thleng mai thin niin hnathawkte chuan ZALEN an hrilh a. “Protocol angin contact tracing ti laite chu lo kal lo hram sela, task force hriatpuina zela a mamawh zualte chauh in-test nise kan duh a. Hetih lai hian phai lama zin tur emaw zirna chhunzawm tur leh a mamawh zual tan chuan a test theih reng a ni,” tiin an sawi bawk.