ZALEN March 13, 2025 : Mizoram-a hmun hniha chhiatna thlengah mi pathum an thi. Vawiin khan Lengpui-ah naupang kum 4 mi chu an thenawmte tuizem-ah a tlahlum a, Belthlei, Lunglei district-ah leimin thut avangin mi pahnihin nunna an chan bawk.

Lengpui-a tuizem-a tlahlum Lalruathlui Tochhawng D/o Vanlalmuanpuia Tochhawng a ni a, kum 4 mi niin a tlakna tuizem hi a pa u te tuizem a ni a, naktuk hian vui a ni ang.

Thudawnna in a sawi danin Lalruathlui tlakna tuizem hi a chhin pawh siam vek tawh a ni a, a chhin dahna hi a fuh tawk loh avangin siamthat a ni a, tuizem hi hmanrawn hlui hmanga chhin mai niin hei hi a rap sual palh ang a, tla ta niin ngaih a ni.

Lalruathlui hi a chin an hriat mai loh avangin darkar khat vel chu an lo zawng hman tawh niin thudawnna chuan a sawi a, a tawpah tuna a tlakna hmun hi ringhlelin hetah hian an hmu ta a ni. Tuizem-ah hian tui feet nga vel dah tawn nia sawi a ni. Lalruathlui hi an fa neih chhun a ni.

Vawiin chawhma dar 9:30 vel khan Belthlei khua, Lunglei District-ah kopang minin mi pahnih a chhilh hlum a, khaw chhunga side drain tur an laih laiin a bul kopang hi a min a, mi pathum chhilhin, pahnih an thi. Pakhat chu a in saseng hman.

Thi te hi Belthlei khaw mi ve ve Vanmawia (29) leh hnathawhna bula lo awm Zothanmawia (14) te an ni a, Naktukah vui an ni ang.