February 21, 2024; Vawiin Assembly Budget Session ah house leader, chief minister ni bawk Lalduhoma'n Hmunphiah lei chungchang a beisei an phak lohna chhan a sawi.

Vawiin Assembly session ah Hmunphiah chungchang sawichhuah niin, thu inchuh a awm a, chief minister-in hemi chungchang hi sawiin, thlai thar pali (4) lei tura an intiam thu leh a rate pawh an puan thu a sawi a, chung zingah chuan Hmunphiah hring an telh loh thu leh an telh ngai dawn loh thu a sawi.

Chung thlai thar an lei turte chu financial year thar atanga an tih tur a an puan a nih thu sawi bawkin, "Kan sawrkar hlimin vote lei nan a sawrkar hmasain a lo ruahman pawisa ningnawi kan hmu a, thlai thar lei nan hmang hlauh ang kan ti a, thlai thar pali (4) kan lei ang kan ti a, thlai thar dang pathum (3) chu kan rate aia sang a lei tur an awm avangin buaipui a ngai lo. Hmunphiah pawh chutiang a tih chu kan tum a, kan rate anga lei duh an awm a, chu chu RR Associates an ni. An lei mai tura kan ngaih laiin rin aiin an lo che thei lo a, manpower an lo nei lo a, kan beisei an phak lo a, kan chesual a ni, chu chu a chhan ber chu a ni," a ti.

"Chutiang chu anih avangin sawrkar hmasa lama an lo tih dawn dan angin, mahni lo inbuaipui rawh u kan ti a, nakum lam atang erawh chuan area wise in tih a lo ngai a ni tih kan zir chhuak tawh," a ti bawk.

Sawrkar hmasain royalty a lo lak sak thin chu tax holiday an puansak tih Lalduhoma chuan sawi bawkin, transit pass pawh free an duh thu leh chumi tello a Vairengte thlang lamah a thawn theih loh avangin, loh theih loh avangin transit pass an la tih a sawi a, nakum kumthar atang chuan area wise in fel taka buatsaih a nih tawh tur thu a sawi.