ZALEN May 6, 2025 : MNF Thalai chuan CM Adviser Dr KC Lalmalsawmzauva’n ‘Mizorama Hmunphiah te Sawrkarin a lei zo vek tawh’ tia a sawichhuak hian Mizoram mipui a barakhaih a, mak tih a hlawh a, sawrkarin hmunphiah lei miah lohna khua leh bial tam tak a nei an ti a, a tak ngeiin an fianfiah an ti a. CM adviser hi ngaihdam dil turin an phut.

Mizoram hmun hrang hranga Hmunphiah chinna hmunte MNYF Hqrs leh MNYF blocks hruaitute chuan a hmuna kalin an tlawh a, Hmun hrang hranga Hmunphiah chingtute an kawm naah Mizoram sawrkarin hmunphiah lei miah lohna khua leh bial a tam hle tih an hmuchhuak an ti. Hachhek bial, West Tuipui bial, Mamit bial, Dampa bial leh Thorang bialah te hian khaw tam takin hmunphiah an ching a, Heng khuaah te hian Mizoram sawrkarin a intiam ang in hmunphiah a lei miah lo tih MNYF hruaitute chuan an hmuchhuak a ni, an ti.

"Hmunphiah chingtute hmunphiah hralhna hre lova lungngaia an tah laia CM Adviser Dr KC Lalmalsawmzauva'n dawt chiang tak sawi a, mipui a bum hi demawm kan ti a, mipui ah ngaihdam a dil ngei MNYF chuan kan phut a ni," an ti.

MNF thalai hruaitu te hian vawiin khan Kolasib District huam chhung a khaw hrang hrang - N. Hlimen, Saipum, Saiphai leh Vairengte a Hmunphiah chingtu te kawmna hun Vice President Lalnunmawia Pautu ho in an nei a ni.

MNYF hruaitu te chuan, "ZPM kaihhruai Mizoram sawrkar in Hmunphiah lei zo vek ang a mipui te a bum duh hi mak kan tiin, Sawrkar kan dem tak zet zet a, Pu Lalduhoma kaihhruai Mizoram sawrkar-in Hmunphiah kan lei zo vek a tih hi dawt niin kuthnathawktu te hmuhsit na leh rahbehna nasa tak ah kan ngai a ni," an ti.

MNYF Headquarters chuan, "N. Hlimen, Saipum, Saiphai leh Vairengte-a Hmunphiah chingtu a hmun ngeia kal chilhin Hmunphiah hi sawrkarin lei lo a, Vai sumdawng ten an duh duh dana rate siam a Hmunphiah hring leh ro an lei hi a pawi kan ti a, Hmunphiah lei chungchanga ZPM sawrkar a in rawlh avanga Hmunphiah ching tute dinhmun a chhiat phah hi pawi kan ti hlé a ni," an ti bawk.