Aizawl February 15, 2024 : MNF chuan an sawrkarah khan kuthnathawktute tan SEDP-ah Vbc 150 an dah a, ZPM kaihhruai sawrkar chuan pawtpengin thlai thar lei nan tiin Vbc 110 dahin, vbc 40 chu Health Care atan an dah nghal an ti. Kuthnathawktute thawh rah hralh chhuah tur awm chho mekah Hmunphiah hralh tur tam tak a awm mek a, chutihlaiin a chingtuten an duh anga hralhna hrelovin an hawihai mek an ti.

MNF chuan, "ZPM Sawrkar hian thlai thar lei nan Vbc 110 an dah chu hmang duh lovin, Hmunphiah lei tur hian RR Associate chu a inremsiam pui chu beisei ang an thlenpui loh hnuah, Society te phungbawmah sawmin kawng kual zawk an dap leh mek a ni. Vawiin thlengin hmunphiah chingtute chuan an hmunphiah hralhchhuah hun tawh em em, chhe mai thei dinhmuna ding chu hralhna hmu mumal lovin hrehawm ti takin hun an hmang mek. ZPM hian Inthlan dawna mipui hmaa an inzawrh ang ngei khan Hmunphiah hi lei thuai turin kan phut a. An inzawrh anga a rang thei ang bera khawsa turin kan hriattir a ni," an ti.

MNF thuchhuak chuan, "Sawrkar kal tawhte a chhe thei ang bera chhuahin, kuthnathawktute hmangaih ber anga an insawi ang ngeiin, Hmunphiah hralh hun tha ral hma ngei hian a chingtute harsatna hi phuhruk thuai turin ZPM kaihhruai Mizoram sawrkar chu a phut tlat a. Tawngka chauha kuthnathawktute duhsak lovin, Thlai thar lei nana an sum dah Vbc 110 hmang hian Hmunphiah hi lei nghal vat turin kan phut tlat a ni," an ti.