ZALEN February 9, 2025 : Kolasib District chhung, Mizorama hmunphiah thar tamna ber bial, Serlui huam chhungah hmunphiah thar vanglai a thleng mek a, hetihlai hian a man (rate) hniam lai ber a thleng mek bawk.

Serlui bial chhung leh Vairengte Aitlanga hmunphiah chingtute hnen atanga thudawn danin tunlai hi hmunphiah thar/seng vanglai a ni mek a, Lailapur leh Bagha-a hnam dang sumdawngte chuan February 5, 2025 atang khan an lei tan a Aitlang zaua mite ta kg. khat Rs. 25-in an leisak a, hmun dang thenkhatah erawh kg. khat Rs. 20-a leisakna khuate pawh a awm.

A chingtute chuan an hmunphiah tharte chu a hringa hralh ngaihna a awm lo tih an sawi a, a buaipui a hautak bakah, a harsa niin an sawi a. Kumin hi a rate hniam ber pawl tum a ni tih an sawi bawk a, nikum atang khan a rate a chhe tan niin an sawi.

“Kum 2020 atang khan a rate a tha chho a, a hring kg. khat Rs. 50-60 te-in kan hralh thin. Hetihlai hian nikum atang khan a rate a chhe tan a, tun dinhmunah chuan Bagha leh Lailapur-a hmunphiaha sumdawng hnam dangte thu thu leh an tih dan danin kan awm mai niin a lang,” tiin thudawnnate chuan an sawi.

“Kan hriat danah chuan Hailakandi lamah chaun a hring kg. khat Rs. 40-in an la a, keini lama a rate a hniam bikna chhan hi kan hre lo,” an ti bawk.

Thudawnnate chuan Serlui bial chu Mizorama hmunphiah thar chhuak hnem ber bial an ni a, Vairengte Aitlang zau ringawta nikuma an thar chhuah pawh quintal 1,000 dawn a tling.

Mizorama hmunphiahte hi January thla tawp lamah an kek tan thin a, February thla chawhma lam hi a vanglai a ni thin a. A par hmaa keh a ngai a, a chhiat hmaa hralh a ngaih bawk avangin a man tlawm mah se, hralh lo thei loin a chingtute an awm mek.

Sawrkarin a lo tar lan tawh angin thlai thar lei turte chu support price pek ngai loa kalpui theih (support price aia sanga hralh theihna)-ah chuan zalen taka lei leh hralh theih (open market) reng a ni a. Support price hnuaia luhpui a tul hunah sawrkar ruahmanna anga kalpui tur a ni thung.

Hmunphiah hi a hring chu support price pek a ni dawn lo a, a ro chauh support price siam a ni a. Sawhthing leh aieng chu sawrkarin support price a pek theih hun chhung chu January - May inkar a ni a, hmarcha leh hmunphiahah January - March a ni.