Aizawl : Nimin khan Mizoram Pradesh Congress Commitee media cell te chuan Congress Bhawanah thuthar thehdarhtute kawmin MNF sawrkar ah advertisement chhuah lovin School Education hnuaiah thawk tur mi 91 lak tawh niin an sawi.

MPCC chuan, “Kum 2018 December thlaa MNFin sorkarna an chan atanga thla 10 chhung (December 2018-September 2019) in School Education hnuaiah advertisement chhuah lo a hnathawktu lak 91 a awm tawh a, 36 chu SSA Mission hnuaia lak niin, 55 chu RMSA Mission hnuaia lak an ni,” tiin an sawi. Advertisement chhuah lo a hnathawktu lak zinga tam zawk chu School Education Minister in ami duhsak zawngte a thun niin an sawi bawk a ni.

SSA leh RMSA khaikhawmtu Samagra Shiksha, Mizoram a SPIO-in RTI zawhna a chhan danin December 2018-September 2019 (thla 10) chhungin SSA Mission bikah hnathawktu 36 lak an ni tawh, Hengte hi advertisement chhuah lo a duhsak zawng lak vek an ni tiin MPCC hian an thuchhuah an tarlang zui. RTI chhanna atanga a lan danin SSA Mission hnuaiah hian he hun chhung hian advertisement chhuah thlapa hnathawktu lak an awm lo a, advertisement chhuah lo a hnathawktu lak a nihna chhan zawhna chu, “Recruitment Rules kan neih loh avangin,” ti a chhan a ni.

MPCC thuchhuah chuan, “Tun hnaia MNF sorkarin MR-a thawk tur Primary School leh Middle School zirtirtu 881 zet a la thar a. School Education Minister-in dik taka lak niin sawi mah se, anmahni party hruaitute leh party mipuite ngeiin Minister hi an rin zawh loh avangin Hnam Run atangin zirtirtu lakna chu ennawn tir leh a ni a, tun thlengin siamrem hna an la thawk zel a ni," an ti.

MR teacher 881 lak tharte hi MR Skilled-II ah dah an ni a, ni khatah Rs. 520/-hlawhin thla khatah Rs. 15,600/- an hlawh tur an ni a, chuti chunga anni aia hlawh tam zawk tur, Rs. 30,000/- thleng hlawh turte advertisement chhuah lo a duhsak zawng lak an ni leh si hi Mizoram mipuite leh thalai lehkhathiam zawkte zah lohnaah an ngaih thu an tarlang tel bawk.