February 1, 2024; Delhi Mizo Zirlai Pawl (DMZP) chuan hun enge maw chen atangin Delhi leh a chhehvel ah hna leh sum kaihhnawiha inbuma ni thei awma lang a tam hle tih an hria a, he thilah hian Mizo thalai inhnamhnawih pawh an thahnem hle niin an hria.

Hemi chungchang hi DMZP chuan uluk takin Dan hre mite, Corporate lama mithiamte leh lo inhnamhnawi tawh thin, a that loh zia hriaa bansan tawhte nen chhui chiangin, inrawnkhawm pawh vawi eng emaw zat an nei tawh tih thuchhuah siamin an tarlang.

DMZP tarlan danin, he inbumna thilah hian a tlangpuiin hna tak tak thawh hma in cheng nuai 1 atanga nuai 2 inkar thawh hmasak a ngai thin a, company pangngai tak hna lak ang thei ber turin formal takin an kalpui thin a, Mizo lehkha thiam hna zawng mekte chu an target ber a ni.

An zirchianna atanga an hmuh danin, heng inbumna thilah hian mahni lam hnai leh thian hnai tak takte pawh an inbum chhuak nual niin a lang a, hemi vang hian hetiang hna leh sum kaihhnawiha thlemna lam chi reng rengah fimkhur a, zirchiang hmasa zel turin an ngen.

Heng thlemna tawka Delhi a hnathawk a kal tum reng reng chuan an hnathawhna hmun tur leh an hnathawh tur hriatchian nan engtiklai pawhin DMZP hruaitute be hreh lo turin an chah.

Delhi Mizo Zirlai Pawl hruaitute :

President : Joy Lalhmangaihi (9862501382)

Gen. Secretary : Lalduhthlana (8794160307)