Aizawl: Mamit khawpui tui indaihlohna phuhru turin Tut lui, Phaizau bul atangin tui lak tum a ni a, tunah hian hna thawh tan mek a ni.

Mamit khawpui tui lakna tur Greater Mamit Water Supply Scheme Part I siamna tur sum hi NABARD atanga hmuh a niin nuai 520.91 hmangin H.Sanga, Aizawl Chanmari chuan a thawk a. December ni 13,2019 atang khan hna bul tanin April 2021 ah zawh hman tum a ni.

PHE thawktute sawi danin tuna Mamit in tui an tlan mek Kurung lui leh Lahmun lui te hi an khawpkham tawh lo hle a, tui hi thla khat ah vawi 2 te an pe thei tawk a. Tuna part I hi zawh anih chuan nitin tui litre maktaduai 3 pump theih an beisei a, hei hian harsatna engemaw chen chu a chhawk thei dawn niin an sawi.

Tun dinhmunah Mamit ah hian mihring 10,000 vel an khawsa mek nia hriat a ni a, Mamit tuilakna hi peih anih chuan mi 30,000 vel chawm thei tura ngaih a ni. Tuna hnathawh mek Greater Mamit Water Supply Scheme Part I bakah hian SEDP atangin part II thawh leh theih thuai an beisei tih PHE thawktu te chuan an sawi a. Project hi zawh anih hun chuan Mamit mai bakah khaw thenawm te pawh tui pek theih tura ruahman a ni.