July 19, 2022; Hnahlan Grape Growers’ Society chuan nimin, July ni 18 thleng khan grape rah quintal 900 an lei tawh a, Champhai Grape Growers’ Society te pawhin quintal 67.57 an lei tawh.

Hnahlan Grape Growers’ Society hruaituten ZALEN an hrilh danin, June ni 20, 2022 atangin grape an lei tan a, kg ah Rs. 60 zel a leiin, nimin thlengin quintal 900 an lei tawh a, quintal 1400 bawr vel lei theih an in beisei. Grape an lei te chu winery ah a tui an sawr nghal zel a ni.

Champhai Grape Growers’ Society te pawhin June ni 13, 2022 khan a thawh khatna atan kg ah Rs. 60 zelin, grape rah quintal 67.57 an lei a, a thawh hnihna atan naktuk ah an lei leh ang. Grape rah te chu lak/lei ni bik an siam a, kar 1 ah vawi 1 emaw, a hmin dan zirin vawi 2 emaw lei turin ruahmanna an siam. Kuminah quintal 1300-1500 vel lei theih an inbeisei. Champhai winery ah grape tui sawrsa wine a siam mai theih litre nuai 1 chuang a awm mek bawk.

Hetihlai hian Mizoram sawrkar chuan wine rules a duang mek nia hriat niin, tun dinhmunah vet (pawmpui/endik) turin Law department-ah a thang mek nia hriat a ni. Hnahlan leh Champhai Grape Growers’ Society hruaitute chuan wine rules chu peihfel a nih hunah cabinet pawmpuina nghak kher lo a 'by circular' ang pawha hman theih an beisei tih an sawi a, chu chu dinhmun hmanhmawhthlak taka an awm tawh vang niin an sawi.