Aizawl: Hnahlan Grape Growers’ and Processing Cooperative Society chuan kumin chhung hian kuthnathawktu te grape tharchhuah quintal 1000 chuang lei an tum a, an mamawh zat lei tur an hmu dawn lo niin an sawi.

Hnahlan Grape Growers’ and Processing Cooperative Society hruaitute hnen atanga Zalen in thu a dawn danin tun dinhmunah grape rah hi kg ah Rs 50 in quintal 500 chuang an lei tawh a. Society hruaitu te chuan kumin hian grape ching an tlem avangin an duh khawp lei tur an hmu dawn lo niin an sawi a, Winery a zem lian an neih 22 zinga a chanve 11 emaw a um/dah khawp chauh lei tur an hmu dawn niin an sawi.

Hnahlan grape chingtu hruaitu te chuan kumin atang hian a hmaa winery atanga an siam-chhuah 'Zawlaidi' aia quality tha leh tui zawk siam an tum niin an sawi a, a hming atan 'Isabella' vuahin a hmaa ENA hmanga grape um 'fortified wine' ang kha ni lovin tunah chuan thiamna sang zawk hmangin grape thlumna la chhuakin wine hi an siam dawn tih an sawi a, a hma aiin tlemin a man pawh a to deuh dawn niin an sawi bawk.

Hnahlan Winery hruaitute chuan Hnahlan leh a chhehvel chu wine tur chinna hmunah puan nise an tan hmalak a awlsam zual sawt dawn nia sawiin, "Grape (Wine) producing region a min puan chuan kan tan hmalak a awlsam lehzual dawn a, reilo te ah chuan min puan theih kan beisei a, kan lawm hle a ni," an ti a. Hetianga sawrkarin a puan chuan kuthnathawk tam lehzualin hamthatna an dawn theih phah dawn niin an sawi.