Aizawl August 13, 2023: Kumin hian Hnahlan Grape Growers & Processing Coop. Society Ltd. chuan grape quintal 989.53 leh Champhai Grape Growers & Processing Society-in quintal 1,006 an lei tawh a. Hnahlan winery hian grape tui dahkhawlna an neih tawh loh avangin kumin bik atan grape lei hi an chawlhsan.

ZALEN thudawn danin Hnahlan Grape Growers & Processing Coop. Society Ltd. hian nikum 2022-a grape tui (Isabella) hralh loh a la tam avangin tanky-in a tlin tawh lo niin an sawi a. Tun dinhmunah grape rah la lo zo lo pawh an la awm nual a. Winery-a dahna tur a awm tawh si loh avangin grape chingtute lo hrethiam turin an ngen a ni.

Kuminah hian Hnahlanah chuan C.Vanlalhriata chuan a thar tam ber a, an chhungkua hian grape 106.97 qtls. an thar a ni.

Champhai winery hian Zirtawpni zan thleng khan grape hi quintal 1,006 an lei tawh a. Grape hi la lei chhunzawm zel an tum niin society hruaitute chuan ZALEN an hrilh a. A hma chuan grape hi kar khatah ni hnih an lei thin a; mahse, tun kar atang chuan Nilainiah chauh lei an tum tawh a ni.

Horticulture department chhinchhiah danin nikum khan Hnahlan chhehvelah grape quintal 1,500 vel thar a niin heta tang hian Rs. 90,00,000 vel an lalut a. Champhai chhehvelah quintal 1,244.98 tharin Rs. 68,69,899.80 an la lut niin an chhut a ni.