ZALEN, Mar. 26, 2025: Hnahthial Police-ten Nilaini tuk khan Khawhri leh Tuichang lei bulah heroin No. 4 hawng 39 an man a, Rs. 13,77,660 man nia chhut a ni.

Police hian an thu dawn bawhzuia tlaivara an chân hnuah gram 459.22-a rit ruihhlo hi an man.

Khawhri-a an man hi gram 217.22 (hawng 17) niin tualchhunga a man chuan Rs. 6,51,660 man nia chhut a ni a. Isak Lalhriatpuia (35), Farm Veng, Lunglei leh R. Lallawmawma (21), Ramthar, Lunglei te bagpack atanga an man niin an phurhna scooter, Ray Z dum leh an mobile phone an man tel.

Tuichang lei bula an man hi gram 242g (hawng 22) niin Rs 7,26,000 man nia chhut a ni a. A phurtu, Lalhunmawia (25), Saikuti Veng, Thingsai leh Lalhmangaihsanga (31), Ramthar Veng, Lunglei te hnen atanga man niin an phurhna lirthei, Alto 800 leh an mobile phone an man tel.

Police hian thubuai an ziak lut a, an mi mante hi Lungleiah hruai nghal an ni bawk.