30th June 2023: Vawiin khan Remna ni champhaphak 37-na lawmna kal zelah district hran hranah Peace Walk neih a ni a. Hnahthial ah chuan khaw chin a chian loh avangin health camp kharna hman a ni thung a. June ni 28 khan Saitual chuan peace walk hi an lo nei tawh bawk.

AIZAWL:  Tourism Department buatsaihin ‘Peace Walk’ neih a ni a. Kawngzawh hi Chanmari leh Sikulpuikawn atanga bultanin, Vanapa Hall kawtah an intawk khawm a ni. I&PR Minister Pu Lalruatkima leh Tourism Development Board Vice Chairman Pu TC Pachhunga ten an hmanpui. 

LUNGLEI : Hmun 2 atanga neih niin Kikawn leh AOC atanga Peace Walk nei tanin Mizofed Venglaiah an infin khawm a, Remna thutiamte lain DC Ramdinliani'n a ho bawk a. Hospital hrang hrangin Free Health Camp an buatsaih.

CHAMPHAI: Dar 7 khan CHANEM tualzawl atanga Circuit House thlenga neih a ni a. Sawrkar hnathawk, Zirlai, NGO, Ex-servicemen leh Assam Rifles-te an tel a. District Bawrhsap Pu James Lalrinchhana'n hmanpuiin Khankawn Police Checkgate, Chalbawia Junction leh Chhungte inkarah thing phun a ni bawk.

KOLASIB: Zing dar 7 ah Diakkawn atangin Venglai Bazar thleng Peace Walk neih a ni a. DC leh MZP hruaitute, SDO, Sadar leh Official ten an telpui bawk a ni. Dar 10 atangin Diakkawn YMA Hall kawtah Remna Ni Free Health camp neih a ni, mi 188 inentir an awm a, damdawi a thlawn a sem a ni.

SERCHHIP: Peace Walk hi DC Office tual atanga UD&PA Office tual thlenga neih tura ruahman lawk chu ruah a sur avangin IOC kawn thlenga neih a ni ta thung a ni. Village Council hrang hrangten faina hnatlang an nei a, EF&CC hmalaknain thing phun a ni bawk.

LAWNGTLAI : Areopagi atanga kawng zawh tanin Chanmari Square ah an tawp a, Assembly Deputy Speaker H.Biakzaua'n a Vailiam a ni. Chhunlamah thisen pek huaihawt a ni bawk.

SIAHA: Tukin zing dar 6:00AM vek khan Siaha District Sports Commitee te bultumin Peace Walk neih a ni.  Vety Kawn, New Siaha atanga tanin District Playground, Siaha Vaihpi thleng zawh a ni bawk.

MAMIT: Mamit-ah chuan Charkawn atangin Pu VL. Remliana, District Bawrhsap hovin remna Ni lawmna kawngzawh (Peace Walk) neih a ni bawk.

KHAWZAWL : Peace Walk ah hian mi 60 vel telin Zaingen YMA Hall kawt atangin Khawzawl Field No. 1 thleng neih a ni. He hun hi Addl. DC Pu Lalfakzuala'n a kaihruaia, sawrkar hnathawk leh NGO te an tel a ni.

SAITUAL: Saitual hian Remna Ni lawmna atana ruat pakhat Peace Walk chu ni 28, June khan an lo nei tawh a. Vawiin khan Saitual College Hall ah Lalchhandama Ralte, Minister LESDE, School Education hoa hunhman niin a hnuah thingphun a ni bawk.

HNAHTHIAL: Hnathialah chuan Health Camp, District Hospital ah ni 2 awh neih a ni thung a, khaw chin a hriat loh avangin Peace Walk hi neih a ni lo a. Health Camp ah hian offline leh online a registration ti mi 2000 vel awmin, Minor Operation tih te pawh nghal a ni. Doctor 14 an kal a ni. He hun hi Dr. R. Lalthangliana, Health Minister hoa hman a ni.