Aizawl June 12, 2023 : MNF Adviser Lalruatkima chuan Zofate rorelna pakhat hnuaia awm chu MNF chuan an nghahhlelh ber a nih thu a sawi a, Zofaten hnam anga beih a tawh mek lai hian Zoramthanga anga hruaitu tha Mizo hnamin a nei lo niin a sawi. 

Vawiina Tuirial West Block MNF Conference, Awithangpa Hall, Kawnpuia hun a hmanpuinaah Lalruatkima chuan, "Zofate'n Hnam anga beih kan tawh mek lai hian Pu Zoramthanga anga leader tha Mizo hnam hian a nei lo. Ramin ri nei mahse, hnamin ri a nei lo. Sakhaw intibing ten kan Biak In te thlengin an hal a, Missionary leh Pastor te chenna in thlengin an hal. Tam tak min that bawk a ni. Kan thinlung a rum a ni. Hmun hrang hranga awm Zofate tahna hi kan tahna a ni a, an mittui hi kan mittui a ni. An tan kan ding tlat zel dawn. Hnam tana silai lek ngam, martar tam tak awm tawhna Party, ramri humhalh tura silai hmetpuak ngam hi hnam chhan turin kan duap dui lovang," a ti.

MNA Adviser chuan, "MNF-te hi a fing ber leh a tha ber leh sawisel kai lo kan ni lo. Mahse, he ram hi kan kutah Pathianin a dah a. Covid hripui, ramri buai, vawk pul, lirnghing leh raltlan lo thleng tur hrelawk Pathian hian hun harsaa he ram leh hnam enkawl tur hian, Pu Zoramthanga sawrkar hi a ring tawk a ni," a ti a. "He sawrkar hian manifesto a nei a, chumi tihlawhtling tur chuan theih tawp chhuahin a bei a. Kan tihhlawhtlin pawh a tam tawh hle. Gas, buhfai tha, tui leh eng tha kan lo nei ta a. Zoram kawngpuiin hma a sawn nasat ziate pawh a taka hmutu mipuite kan ni a. thalaite tan kawng hrang hrangin hmalak a ni a, an infiamna tur futsal leh phullem pawh kan phah tam hle a ni," a ti bawk.

Lalruatkima chuan Mizo hnam tana martar te leh hnam sipaite zahna chibai a buk tih sawiin, "Zofaten zalenna meichher kan chhi a, thangtharte thinlungah Mizo a awm chhung chuan Mizo Nationalism hi a mit tawh dawn lo," a ti a. "Zofa hmun hrang hranga thendarha awmte Isua Krista ringtu kan ni vekte hi a makin Pathian hnam hriat kan nih zia a chiang hle a. Tunah kan unaute Zofate Jerusalem-ah an lo haw mek a, an tawng a lo awn deuh a nih pawhin unau vek kan ni tih i hrereng ang u," a ti. 

MNF Adviser chuan, "Hun harsaa he ram kan kuta dah ngam Pathian hian hun tha leh thawl zawka he ram enkawl tur hian min ring rawk ang tih ka ring a. Policy-a buai lo, Leader-a buai ve lo Pathian leh kan ram tan titu Party hi kan sorkar leh ngeiin ka ring a ni," a ti bawk.