Aizawl February 1, 2023: Vawiin khan Chanmari YMA Hall, Aizawl-ah ZPM Zonu AMC Area Intuaitharna neih a ni a, he hun hmanpuitu ZPM Leader Lalduhoma thawhrimna inzirtirna kawngah Zonu te an pawimawh thu a sawi a, hnam lungphum phum that a ngaih thu te, politics chu Pathian rawngbawlna maicham pawimawh a ni thu te, CSS kalphung thar leh MSSSB a hmuh dan chungchang te a sawi.

Lalduhoma chuan, “Tunlai hian kan party kan thang nasa hle a, Zonu pawh khawpui chhungah leh thingtlangah unit thahnem tak kan nei der tawh tih ka hriatin a lawmawm takzet a ni. Kalphung thar Mipui sawrkar siama danglamna thlen kan tum a, thawhrimna kan inzirtir mek a; chhungkua leh khawtlanga thawhrim inzirtirna kawngah Zonu te in pawimawh hle,” a ti. 

Duhoma chuan, “Kan party kalphung hi siam that a ngai a, kan hnam lungphum hi phum that a ngai a ni. Mizoramah political party a lo din tirh khan a hmatawngah kohhran hruaitu engemawzat an tel a ni. Mipui rawngbawlna, Pathian rawngbawlna niin an ngai a, a ni reng a ni. Politic hi a thianghlim a, mihring leh Pathian rawngbawlna maicham pawimawh tak a ni. Hun a lo kal leh hret a, party inbeihna kha a na ta em em mai a, inbeihnaah kan chhuah ta a ni. Mi ramah chuan an ram zalenna sual tur tein party an din a, rilru thianghlim takin politics-ah an lut a. Kan ramah chuan do nei sa, ep neisain party kan din a. Party kan din tirh atangin lamtang awmsain kan awm a, vawiin thlengin chu chu kan rochun chho ta a, hei hi a pawi takzet a ni," a ti. 

ZPM Leader chuan, “ZPM hi mipuiten min X-ray mek a, kan policy avangin miten min thlir mek; beiseina sang tak an neih avangin party dang anga kan kal a rem ve lo. Politics hi beisei neiin khelh fuh an tum thin a, keini chuan khelh dik kan tum. MLA fund-te hi kohhran pawisa anga hman chuan daihzai tak a ni a, tangkai taka hman theih a ni tih ZPM MLA ten kan lantir mek a ni,” a ti. “Ruling nih avanga awm mai mai a eng eng emaw therhlo dawn tawp tumna rilru hi kan kalsan tur a ni; thawhrimna kan zuar a, ZPM chu kan thawkrim ber tur a ni,” a ti. “Tunlaiah party ngawlveina leh ruihchilhna a tlem chho tial tial a, kan thalai fing tak tak leh thil thlir zauten kan ram hi an la kaihruai chho dawn a. Chutianga party tan lam bik nei lo, neutral kan tam ber tihah kan ram hi a dam ang,” a ti.

CSS kalphung thar chuangchang sawiin, Duhoma chuan, “Kum 2019 atanga Centrally Sponsored Scheme (CSS) kan dawn te kha a guidelines angin sawrkarin a hmang lo a, a dawngtu ten an hmang lo bawk thin. CSS hi state leh central intumtawm – state-in 10%, central-in 90% an tum thin. A nih tur anga kan hman loh avangin central-in na takin a rawn vau a, chuvang chuan a theih ang ang an han khawnkhawm a, vaibelchhe 600 an ngah thei hram. Tun hnuah ni 21 chhungin a dawngtu tur ten an dawn zel a ngaih tawh dawn avangin a kalsual hlei thei tawh dawn lo a, hei hi kalphung thar chi khat a ni a, he system ang hi ZPM-in kalpui kan tum chu a ni,” a ti. 

Mizoram Subordinate Services Selection Board (MSSSB) chungchang sawiin Duha chuan, “Sawrkar hna lak reng rengah MPSC-in dik taka hna an lak theih nan hma kan la dawn a, kan thuam chak dawn a ni. MSSSB hi party mi leh sa induhsakna, uchuak taka hna lakna, thalaite tibeidawngtu a ni. Vawiinah zirlaiten MSSSB chairman pisa kai tur an dang tih ka lo hria a, zirlaite thil tih hi kan party chuan kan thlawp tlat a ni. Party induhsakna atana siam chawp MSSSB hi Pathian leh Mipui zarah sawrkarna kan siam ve hlauh te a nih chuan kan thiah tur thu kan lo sawi tawh thin. Vawiinah pawh hian sawi nawn leh ka duh, kan sawrkar atanga ni 100 chhungin kan thiat ang a, a tul a nih chuan MPSC kan thuam chak ang,” a ti bawk.