Bollywood star Alia Bhatt chu a vawi khat nan Hollywood-ah a inlan dawn tih media hrang hrangten an tarlang a, Gal Gadot kiangah hun a hmang thei dawn.  

Alia Bhatt hi Netflix film 'Heart Of Stone' ah a inlan dawn a, a Hollywood debut-ah hian lemchan khawvela hriat hlawh ber zinga mi Israeli actress Gal Gadot a chanpui thei dawn a ni. Northern Ireland actor Jamie Dornan a inlan dawn bawk a, English filmmaker Tom Harper chu director a ni ang. 

Kum 28 mi Alia Bhatt chuan Hollywood-a a inlan tur chungchang hi Instagram kaltlangin a nemnghet a, Deadline Hollywood post chu a share a ni. Deadline Hollywood hian Hollywood-a a vawi khat nana a inlan tur thu leh Gal Gadot nena an chan dun tur thu hi an tarlang a ni. 
Spy thriller film 'Heart of Stone' hi Netflix-ah en theiha chhawpchhuah a ni dawn a, India mipuite en chak ber tur zinga mi a ni ngei ang. 'Wonder Woman' star Gal Gadot a chanpui dawn miau avangin a boruak a lian a, Gal Gadot pawhin Alia hi a lawmpui thu leh inhmuh hlan a nghahhleh tawh thu a lo sawi chhuak ve mek bawk. 

Alia Bhatt tan a vawi khatna tur a nih miau avangi lawmpuitu pawh a ngah a, chung zingah chuan - Samantha Ruth Prabhu, Ranveer Singh, Zoya Akhtar, Hrithik Roshan, Karan Johar, Arjun Kapoor leh Ananya Panday te pawh an tel. Bollywood lamah erawh a mikhual lo hle a, tun hnai khan a channa 'Gangubai Kathiawadi' chu tihchhuah niin, a hit hle a ni. India rama film award ngaihhlut tak Filmfare Award pawh vawi eng emaw zat a lo dawng tawh a ni.