Aizawl January 30, 2024 : Mizo Students’ Union, General Headquarters, Aizawl chuan vawiin khan Home Minister K. Sapdanga hmuin Mizorama hnam dang khawsa Meitei te’n ILP an neih ngei theihna tur atana hma la turin an thlen. MSU chuan boundary hnaiha department head post hrang hrangah Mizo ngei dah zel turin an ngen a, FMR tihtawp tumna leh Border fencing tih tumna dodalna kawngah sawrkar hma lakna thlawp zel an tum thu an thlen bawk.

MSU chuan Home Minister hnenah hian Mizote inhungbikna Inner Line Permit Bengal Eastern Frintier Regulation (BERF) 1873-in a phut anga ILP nei lova khawsa Meitei-te chu General Category an nih ang ngeia ILP an neih a tul a, dan lova khawsa te dap chhuak tur leh ILP an neih thuai theihna tur atana hma la turin an ngen. Home Minister chuan Home Department hotute a lo sawipui nghal tur thuin MSU hruaitute hi a lo chhang a ni.

MSU hruaitute chuan Mizoram ramri depa sawrkar department hrang hrangah ram leh hnam himna tur leh buaina chhuah thila chak zawka hma lak theihna turin Head of Department-ah Mizo ngei dah turin an thlen bawk a. Central sawrkarin Free Movement Regime tihtawp tuma hma a lakna leh Border Fencing siam a tum chu an duh loh thu leh Mizoram sawrkarin he thil a thlen lohna tura hma a lakna chu MSU chuan a thlawp tlat thu leh sawrkar hma laknaah a theih anga ṭanpui tura an inpeih reng thu an thlen bawk.