Aizawl September 29, 2023 : Mizoram Home Minister  Lalchamliana chuan vawiin khan Vairengte, Kolasib District-ah 1st India Reserve Battalion Company Advance Headquarters thar a hawng.

Home Minister hian Vairengte IOC Venga 1st IR Bn Company Advance Headquarters hmuna a hawnna lungphun khuhna puanzar pawt hawngin, Company Advance Headquarters building te leh a hmunhma a fang kual nghal a. Home Minister hi a nupui Nuchhungi; Serlui bialtu MLA, Rubber & Allied Crops Development Board Vice Chairman Lalrinsanga Ralte leh a nupui Lalhminghlui; Inspector General of Police (Headquarters) Lalbiakthanga Khiangte; Kolasib District Sr Superintendent of Police Lalrinawma Traite leh 1st IR Bn Commandant Vanlalnghenga te bakah official leh political party hruaitute'n an tawiawm a ni.

1st IR Bn Company Advance Headquarters, Vairengte hi cheng nuai 223.71 senga din a ni a. June 10, 2022 khan hna tan niin, June ni 30, 2023-ah zawh a ni a. Sipai 30 awm theihna bahrik (30-men barrack) pathum, Sipai 10 awm theihna bahrik hun sawn theih (10-men barrack steel structure) sawm, NCO/JCO Barrack cum Arm Kote square metre 285-a zau, Type-III Quarters pahnih, Kitchen cum Dining Hall square metre 48-a zau, latrine block pathum leh sentry post pahnih a awm a ni.