Aizawl: Tun hnaia hmarchhak state 4 atanga lo haw zingah sawrkar quarantine centre ah awm lova mahni in lama inkhung hran (home quarantine) dil an tam niin Zalen chuan thu a dawng a. Hetih lai hian home quarantine dil hi an tam lo niin Civil Hospital, Aizawl lam chuan an sawi thung.

Tunhnaia Assam, Meghalaya, Manipur leh Tripura atanga zirlai leh hnathawka awm, sawrkarin a hruai haw zing ah in lama inkhung dil an tam hle a, in lama inenkawl dil zinga a tam zawk hi politician chhungkhat hnai te leh sawrkar hnathawk lian te an ni tlangpui a. An dilna hi medical board ah thlen anih thin avangin board pawh an lu a hai hle niin Zalen chuan thu a dawng a. Hetih lai hian Civil Hospital, Aizawl a Medical Superintendent Dr. Lalhmuchhuaka chuan an ruahmanna zawm thei te chauh in lama inenkawl phalna hi Medical Board chuan an pe niin Zalen a hrilh.

Home quarantine chungchangah hian CHA Medical Superintendent Dr. Lalhmuchhuaka chuan state dang atanga lo haw ten an zawm ngei ngei tura sawrkarin inkaihhruaina a siam leh Local Task Force ten an dilpui te hnenah chauh home quarantine phalna hi an pe niin Zalen palai a hrilh a. "Kan ngaih pawimawh tawp chu LTF te an ni a. Annin room hrang liau liau nei leh inkhung thei nia an sawi bakah an lo enzui theih te hnenah chauh phalna kan pe a. Hmun thenkhat chu sawrkar quarantine centre aia him te pawh a awm a ni," tiin party 4/5 vel hnen ah bak home quarantine phalna an la pe lo niin a sawi bawk. Dr. Lalhmuchhuaka chuan mi thenkhat ten thuneitu sang lam atanga home quarantine tura nawrna an dawng nia sawi chu a dik lo a ni tih a sawi a. "Home quarantine dil hi an tam lova, kan dawn zingah pawh Minister emaw thuneitu sang atangin pressure pakhat mah, phone leh ziak pawhin kan dawng lo a, kan lawm hle a ni," a ti bawk.

Hemi chung changah hian senior Doctor pakhat chuan home quarantine chu Doctor te’n an support lo tih sawiin, "Hun kal tawhah quarantine laia lo lengchhuak te an awm a. In lama quarantine hi a nihna takah chuan chhungte nen inpawh miah lo tur an ni a, chaw pawh a hranga ei tur anih bakah inthiarna leh inbualna hmun pawh a hrang vek tur a ni bawk a. Hetia indahhran hi inkhawngaihna nen chhungkaw tam ber hian kan thei lo a, chuvangin quarantine centre-ah hian awm se kan duh ber a ni," a ti a. Tunah harsatna awm hrih lo mah se, an chhungte atangin midang kaidarhna chance hi a sang thei hle a ni a ti bawk.