Aizawl; Mizorama ruihhlo ngai enkawlna home/centre hrang hrang 12ah mi 1,871 an awm mek a, chung zinga 279-te chu hmeichhia an ni a. Hetih lai hian tun hnai kum thum leh a chanve (2019 - May, 2022) chhunga Excise & Narcotics (END) leh Mizoram police-ten heroin an man zat chu kg 98.04 a tling.

ZALEN thudawn danin, (August 2, 2022 angin) ruihhlo ngai enkawlna home/centre hrang hrang 12 zingah Tawngtai Bethel Camping Centre (TBCC) chu ruihhlo ngai enkawl tam ber an ni a, mipa 582 leh hmeichhia 91, an vaiin mi 673 an awm a. TNT-ah mipa 480 leh hmeichhia 100, an vaiin mi 580 an awm a. Mizoram sawrkarin ruihhlo ngai enkawlna a din, Sethawnah mipa 39 leh hmeichhia pathum, an vaiin mi 42 an awm bawk.

August 2, 2022 thlenga home/centre 12-a ruihhlo ngai enkawl mi 1,871 zinga 1,592 chu mipa an ni a, 279 chu hmeichhia an ni.

Heng home/centre 12-te bak ruihhlo ngai enkawlna dang a awm nual a, chunga awmte nen chuan ruihhlo ngai home/centre-a awm an tam hle tur a ngaih a ni.

Hetih lai hian kum 2019 - May, 2022 chhungin END leh Mizoram police-ten heroin an man zawng zawng chu kg 98.04 a tling a, hemi hun chhunga heroin an man tam ber kum chu 2021 niin, END-in kg 19.73 leh police-in kg 15.79, a vaiin kg 34.52 a ni.

Mizoramah tun hma aiin ruihhlo man (rate) a tlahniam hle tih ZALEN chuan thu a dawng a, drugs-a inchui thin pawh MSACS chhinchhiah danin June, 2022 thleng khan mi 11,693 an awm.

Myanmar ram buai vangin dan leh thupek a mumal lo va, hemi vang hian Mizoramah drugs tawlhruk/smuggling a hluar phah nia ngaih a ni bawk.

END/POLICE: Heroin man zat (in kg)
Kum        Man zat
2019       23.71
2020       20.36
2021       34.52
2022       19.81
TOTAL    98.04