Aizawl April 3, 2022 : Russian sipai te chuan Ukraine khawpui bul lawka awm Hostomel airport chu an chhuahsan mek niin an sawi a hetihlai hian Ukraine lam pawhin Russian sipai te hi Kyive chheh vel atangin an nawr let ve reng niin, Britist military inteliggence te chuan an sawi.

Ukraine khaw chhak lamah pawh Ukraine sipai te chuan anmahni run tu te hi an nawr let ve reng bawk a, inbeihna nasa tak karah Kharkhiv chhak lamah pawh dinhmun tha an luah chho mek niin, sawi a ni bawk.

Nato general secretary chuan Ukraine-a Russian sipai te chu infawmkhawm lehin he ram khawchhak lamah hian inbeihna thawrthawh leh an tum niin a sawi thung.

"Russia hian intelkhawm leh a, supply lam pawh tih chak a, inthuamchak leh an tum mek," Jens Stoltenberg chuan a ti.

UK chuan Russia hian an tha tichak turin Georgia atangin sipai 1,200 atanga 2,000 vel an chahlut mek niin an sawi.

Moscow thung hi chuan sipai lam chakna hi Ukraine hmarlamah chuan tih tlem an tum thu a sawi a, chhim chhak lam Donbas region lamah thawhhona tha a awm theih nan an nih thu an sawi ve thung.

Stoltenberg chuan Russia-in sipai chakna hmanga hnehna chan an tumna hi a la tawp lo, a ti.

"Artilery hmangin khawpui tam tak an bei reng a, chutihrualin Russia hian an sipai te dinhmun siamthat an tum mek, thenkhat te an kalkual tir reng bawk a, a bik takin Donbas lamah an insawrbing hle. Chutihrual chuan Russia hian Kyiv leh khawpui dangah tan an la khawh nasa hle. Chuvangin kan theih angin tan kan khawh ve ang, tawrhna nasa zawk an tawrh theihna turin," a ti.

Stoltenberg-a thusawi hi tuihnihin UK Defence Secretary Ben Wallamce chuan Russia-in tactic a hman hi inhnuhdawh tumna a ni lo, a ti a, UK chuan Georgia atanga sipai lakluh hi Moscow in a tir atanga a thil tum a ni lo an ti bawk.