March 11, 2025; Asenchi lane, Vaivakawn Zohnuaia zu zuarte tih rem an nihna ah Vaivakawn khawtlang an fakawm tih Excise ministerin a sawi a, hetihlai hian helai hmun a zu khawih thinte chu world bank road lamah an insawn nia a lan thu a bialtu MLA in house-ah a sawi chhuak.

Vawiin assembly session zawhna leh chhanna huna member te zawhna leh zawh belhna te chhanga he thu hi sawiin excise minister Lalnghinglova Hmar chuan, asenchi lane, Vaivakawn Zohnuai a zu zuar thin te an lo rem ta chu excise te hmalakna a nih rualin Vaivakawn khawtlangte vang a ni tel tih a sawi a, an thawh hlawk hle niin a sawi. Helai hmunah hian excise duty tun thlengin an la awm reng niin a sawi.

Excise minister chuan asenchi lane tia hriat chu veng duakin lang mah se, a lui lam leh a mawng lamah te zu sakna hmunpui te a la awm reng niin a sawi. "A aia hla zawkah an kal a, zu chhe zawk an sa a, in lo thei lo mizo thalai ten kan thihpui avang hian engchin a khauh tur nge tih hi ngun taka ngaihtuah ngai ve bawk," tiin a sawi.

Hetihlai hian Aizawl South II bialtu MLA Lalchhuanthanga chuan, asenchi lane lam a zu khawih thinte chu world bank road lamah an insawn niin a lang tih house a hrilh thung a, MLA thu sawi hi excise minister chuan a dik a rin thu a sawi bawk.