ZALEN February 23, 2025 : Assembly session neih mekah Zirtawpni kalta khan Tuirial bialtu MLA K.Laldawngliana private member resolution 'Mizoram Sorkar-in Lengpui Airport, Indian Air Force kuta hlan emaw hralh tum a, hma a lak mek hi tha ka ti lo va ti tawp rawh se' tih chu hun engemaw chen sawiho anih hnuah hnawl a ni. Sawihona khaihkhawmtu Chief Minister Lalduhoma chuan, "Kan tana tha turah chuan huaisen takin kan ti ang a, ram tana tha lo chu kan ti lo ang," a ti.

Resolution puluttu Tuirial bialtu MLA K.Laldawngliana chuan Lengpui airport chu Mizoram hmasawnna ruhrel langsar zinga mi khawvel dang nena kan inkalpawhna awm chhun a ni tih a sawi a. "Lengpui airport hi damlo, zirlai, sumdawng leh sawrkar hnathawk ten an chhawr tangkai hle a. Hetih kara Indian Air Force kuta hlan tum hi ram leh hnam pawikhawihna a ni," tiin Lengpui tumhmun IAF kuta hlan chu ram leh hnam pawikhawihna niin a sawi.

Opposition leader Lalchhandama Ralte pawhin Lengpui airport chu Mizoram rohlu leh airport hmasawn chak, intodelh chho mek a ni tih a sawi a. "Indian Air Force in hmarchhaka airport an enkawl a thatlohzia kan hmu a. Lengpui hi airforce kutah hlan ta ila defence chauh an ngaihtuah dawn a. Chuvangin an kuta hlan loh hram kan duh a, Airport Authority of India nen indawrna tihtawp tawh kha tihnun leh ngei nise kan duh a ni," a ti.

Sawihona khaikhawmtu House Leader leh Chief Minister ni bawk Lalduhoma chuan, "Sawrkar lai apiangin Lengpui airport hi kan mangan pui a, sawrkar kal tawhte pawhin AAI kutah hlan an lo tum tawh a, mahse an theih loh avangin vawiin hi kan thleng ta a ni," a ti. Chief Minister chuan AAI ai chuan IAF kuta hlan chu tun dinhmunah chuan a tha zawk tih sawiin, "AAI hi chuan a hlawkna tel vek an tum bakah ram neih hlen an tum avangin kan tan phal chi a ni lo a. IAF hi chuan tuna terminal building ni lo ram lehlam hi changin runway dang an siam ang a, a ram hi pe hlen lovin kan hawh tir mai dawn chauh a ni," a ti.

IAF kuta airport hlan chu an duhthusam a ni bik lo tih sawi bawkin, "Finance Commission an lo kal hunah a enkawlna tur sum vaibelchhe 1000 vel kan lo dil ang a, min pek theih chuan enkawl chhunzawm hi kan duhthusam a ni a. Hei hi a theih loh chuan AAI hi kan dawr chhunzawm leh ang a, a rem loh chuan huaisen takin kan kal a ngai dawn a ni," tiin Lengpui airport hralh/hlan tum tih chu an la dai pha lo niin a sawi bawk.