ZALEN March 4, 2025 : Mizo National Front chuan Mizoram Budget Session kal mekah March 3, 2025-a MYC bill sawiho a nih laia Mizoram Chief Minister leh House Leader Lalduhoma'n MYC dinna leh a kalpui dan lo awm tawh chu hman chhunzawm tlak loh leh sawrkar kal tawhten anmahni inhaivurna tura din leh kalpui anga a sawi duh chu demawm an ti.

MNF chuan, "Heng bill te hi sawi ho leh pass anih lai pawha MLA ni ve reng, a hunlaia engmah sawilang lo, tuna a chhe ber anga a chhuah duh hi mi rilru hrisel lo a nihzia pholangtuah kan ngai a ni. Sawrkar kal tawhte a chhe thei ang ber leh ram roreltu mipuiin an thlanchhuah tawhte zahphahna nei hauh lova anchhe tinreng nena a diriam duh mai kha kan ram hruaitu luber tih turah kan ngai lova, House zahawmna leh Hruaitu kal tate zahawmna hum tur berin a mawhphurhna hre hauh lova thianghlim ber leh tha ber anga a intarlang duh mai kha mi pangngai tih turah kan ngai lo a ni," an ti.

"Dan siamthat, belh ngai belh leh paihthen ngai paih then hi thil kalphung a ni a, a hunlai mil ang zela mamawh leh tul anga dan te hi siam a, hman a ni thin. Siamthat mai ni lova, a hlui hnawl a, a thar siam duhna rilru kha tak a lo lang ta a ni.

"House leader ber thusawi, house kalphung lo lutuk dodalna leh house zahawmna hum tura Opposition MLA ten huaisen taka bill an pass pui lo ngam kha chhuanawm kan tiin, an huaisenna leh inpekna fakawm kan ti takzet a ni. House Leader ber hian hetiang thil zahpuiawm tak hi chingnawn tawhlo se kan duh takzet a ni," an ti bawk.

MNF chuan Budget session kal mekah, sawrkar venpuina leh khalhngil kawnga Opposition MLA te thawhrimna leh an hriatna hmanchhuah kawnga an chetdan te a ropui an ti a, ram tana thiltha thlen tur leh khua leh tuite hamthatna tura an auchhuahna te fakawm tiin, a bik takin MNF MLA te huaisenna chu ram rorelna kal mekah rohlu-ah an ngai a. Venpui ngai sawrkar neih mek venpui kawnga theihtawp chhuah chhunzawm zel turin duhsakna an hlan a ni.