ZALEN March 21, 2025 : Mizoram Congress chuan Vawiin khan Congress Bhavan-ah Friday Political Session an hmang a, he huna thusawitu MPCC Vice President C. Ngunlianchunga chuan Assembly House Leader chu House pa ber nih tlin lovah a ngaih thu a sawi.

Ngunlianchunga, MLA chuan, "House Leader hian mawhphurhna sang tak an nei a, Assembly House ah pa ber chan an chang thin. Kan CM hian House-ah hian pa ber nih a tlin lo niin a lang, opposition te hi hmaisa chungin lokal pawh ni se, house leader chuan a lo ti dai tur a nih laiin ani chuan a lo tihsat belh emaw tih tur a ni. Keima chungchangah pawh ka thiam leh thiam loh chu thudang ni se, kalphung pangngaiah chuan faten thil an ti dik lo a nih chuan pindanah kan ko a, 'Mama i thil tih hi a dik lo a ni,' tiin kan zilh thin a, khawtlangah mualpho takin kan aupui ngai lo. Kan CM khan min ko se, hei, chuti khati chu a ni a, tiin min sawipui se, chu chu mi puitling zia a ni," a ti.

"MYC Act chungchangah khan repeal lova amendment anga kal tir a tha lawm ni tihte kan sawi a. Hemi chungchangah hian Chief Minister-in Audit theihna dan mumal awm lova a sawi leh duh duh dana hna lak leh sum hman a nih thu a sawi a. Khatah khan audit theihna kha a lo awm sa a, gazette-ah hial chhuah a ni tih document nen pho chhuah a ni a. Speaker hnenah house property atan hlan a ni a, speaker chuan house-ah a chhiar chhuak hial a nih kha. Amah ngeiin House chhungah MYC Audit vawi hnih neih a ni tawh tih a sawi leh a ni," a ti.

MPCC Vice President chuan, "A minister ten a thusawi dik loh zia house chhungah an pho lan sak te kha thil zahthlak tak a ni a, kalphung tha lo tak a ni a, a Minister leh MLA ten No-Confidence motion an pulut ang a ni."

"Sum awm tamna portfolio chang lo tura insawi khan a pumhmawm hmak hmak mai a. Minister te a ring zo ta lo em ni? Sum tamna department nia lang te chu CM portfolio chan turah sawn zel a ni."

"Assembly house-ah MNF unaute an ti khawngaihthlak hle mai a, zawhna an zawhte khan an zawhna chhang lovin a zawttute kha an chirhtheh ta chiam zel a, khatiang kha a parliamentarian lo em em a, a zahthlak hle a ni.

"Sawhthing chungchangah te hian kan CM hian a pha kual nasa thei em em a, khaw thenkhatah chuan ZPM sawhthing lo chu lei sak duh lo te an awm a, February 20 atangin sawrkarin kan lei dawn an tih avangin kuthnathawhktu ten an cho ve a, an lei leh ta mang si lova, kutthnathawktute an khawngaihthlak takzet a ni." a ti bawk.