Aizawl: November ni 5 a neih tur Sinlung Hill Council (SHC) inthlan hmasaber tur chung changah HPC(D) chuan thuchhuah siamin boruak muanawm leh zalen a awm theih nan mipuite an ngen a, bawhchhia an awm chuan hrem an nih tur thu a sawi.

HPC(D) General Headquarter chuan an thuchhuahah hian mipui te hnenah hian ngenna an siam rualin duhsakna an hlan a, inremna leh muanna tichhe zawnga hma lakna reng reng an dodal tawh tih an thuchhuahah hian an tarlang.

Social media lamah thu belhchian dawl lo, mi mal leh pawl hminga thuchhuah siam lo tur leh fimkhur turin mipui lam an hriattir a, tilui an awm chuan HPC(D) General Headquarter chuan an chhui zui tur thu leh an phu tawk hremna an pek tur thu an tarlang.