Aizawl: Nimin zing khan High Power Committee Vice Chairman Lawmawma Tochhawng chuan Lunglei Ramthar veng chhung inkalpawhna kawng RCC paving cheng nuai 7 chuang senga siam chu mipuite hman theih turin a hawng.

HPC Vice Chairman chuan Ramthar VC te thahnemngaihna leh mi tlawmngai te inpekna avanga inkalpawhna kawng pawimawh tak siam a ni chu lawmawm a tih thu leh vengchhung mipui ten tangkai taka an hman a beisei thu a sawi. Lawmawma Tochhawng chuan vengchhung hmasawnna hi vawikhat ah lian tak tih theih nilo mahse tlem te te infawk khawm hian hmasawnna lian tak min thlen thin a ni tiin, tuna kawng hawn tak pawh hi a neitu veng mipui ten kan hlut thiama kan enkawl thiam a pawimawh a ni, a ti bawk.

HPC Vice chairman in a hawn tak kawng hi Ft. 321 a sei, Ft. 10 a zau niin, Rs. 7,40,823/-senga siam RCC Paving niin, May ni 8 atanga June ni 15,2020 chhunga bialtu MLA leh VC te thawhkhawm atanga siam a ni.

Nimin vek khan HPC Vice Chairman leh amah zuitute hian Ramthar Veng chhunga Commerce & Industries Department hmalakna Handloom Centre buatsaih mek leh Ramthar Veng Hall sak mek tlawhin a hnathawktute harsatna te sawipuiin ruahmanna a siam pui a ni.