Aizawl : Nimin November ni 14, 2020 (Inrinni) khan Aizawl East I biala Falkland vengah ZPM chuan Vice President K. Sapdanga hovin Unit thar an din tih an pawl thuchhuah chuan a taralang.

Unit thar dinnaah hian thusawitu K Sapdanga Vice President chuan, “Kalphung thar, mipui sawrkar din duha tuihal Mizoram hmun hrang hrangah kan pung zel a. Hrileng avangin Zoram hmun hrang hrang atanga min rawn auhna chhang thei rih lo mah ila, hrileng karah pawh ZPM in kallai a kham lo a; MLA Election neih leh nan kum 3 lai la awm mah se, mipuiin ZPM ah rinna nghatin, Kalphung thar, Mipui sawrkar din hlan nghakhlel a, ZPM Party an rawn zawm ruih ruih ta mai hi, ZPM hruaitute kan fel vangte, kan that bik vangte, kan remhriat bik vangte ni lovin, chung lam hnathawh liau liau a ni,” a ti.

East Tuipui Constituency chhungah ZPM zawm thar chhungkaw engemawzat an awm tih pawh an thuchhuahah hian tarlangin, East Tuipui Constituency chhunga Farkawn khuaah chhungkaw 91, Mualveng atangin chhungkaw 61 leh Chhimveng atangin chhungkaw 30 ten ZPM an zawm thar niin an tarlang a, He huna thusawitu East I Block President H Zalawra chuan, “Kalphung thar, mipui sawrkar din thlahlel-a ZPM party zawm thar kan pung zel hi a lawmawm takzet a ni,” a ti.