Aizawl January 26, 2023: Hrianghmun khua a nimin January 25, 2023-a kangmei chhuak avanga In 4 a kangral vekna hmun chu vawiin khan Dr. L. Thangmawia, MLA chuan a hmunah a tlawh. Kangmeiin a tihchhiat hlut zawng hi Cheng 38,89,250 man vel nia chhut a ni.

Kangmei hi nimin dar 1:40pm velah Khamdopaua In atangin a chhuak a, a thenawm in pahnih Pausianliana leh Chin-eni te in kang kaiin an kang ral vek a. Kawngchhak lama Liandala in kangkai lehin a kang ral leh a, inhnuaia Tractor a kang chhe tel bawk a, a thenawm Kaituanga in kangkai lehin a bang sir khat leh inchhung bungrua thenkhat kang hmanin mi tlawmngai ten an thelhmit a ni. Kangmei chhuakah hian Vawk 4 kang hlumin 3 a kang hliam a, buh tin 700 vel a kang chhe tel a, a thil tihchhiat hlut lam hi Rs 38,89,250 ni a chhut a ni.

Dr. L. Thangmawia chuan chhiattawh thu a hriat veleh nizan khan a pan nghal a. Chhiat tawk chhungkua te tlawh kualin Sawrkar anga tih theih awm apiangah theihtawp chhuah a nih tur thu a hrilh a. In kang ral vek chhungkaw 4 te Rs 5000 theuh leh in kang ral lo chhungkua Rs 2000 a pek bakah Silpouline pakhat theuh a pe a, Hrianghmun khawtlang hruaitute hnenah hnatlang thingpui lumna turin Rs 3000 a pe bawk.

Hrianghmun khawtlang hruaitute chuan he an khawtlang chhiat tawh a theihtawpa tanpuitu Mimbung leh Teikhang khua te, Ngopa RD Block VC Association te, 2nd Assam Rifles Mimbunga mi te, Bialtu MLA, Saitual DC, Ngopa BDO leh Ngopa Police ten theihtawp an chhuahpui naah lawmthu an sawi.