Aizawl: Indian Medical Association, Mizoram Branch President Dr. Rosangluaia chuan hri-leng reng reng chu a rei tulh tulh chuan a ziaawm hret hret thei niin a sawi.

Zalen in a biakna ah Dr. Rosangluaia chuan, "Khawvel puma natna hrileng SARS, Ebola etc. te chu thla 2/3 te a daih a. Mahse Covid erawhchu inkaichhawn a awl avang in a reh hun tur a chiang lo a. Mithiamte chhut dan chuan hrileng reng reng hi a rei tulh tulh chuan a chakna a hloh hret hret turah an ngai a, mahse Covid erawh a ni ngei em tih a la hriat loh a ni," a ti. Dr. Rosangluaia chuan Italy leh USA a Covid hrileng te leh India rama mite chu a inanglo thei nia sawiin hmundang aiin India rama thihpui an tlem chhan hi hriat a la ni lo a, nakin lawkah chuan tlang hrileng pakhat ang a la ni dawn niin mithiamte chuan an ring tih a sawi.

Doctor rual ten inkhunghran hun chhungtura sawrkarin a ruat ni 14 atanga 21 ni tura an rawt chhan chu natna hrik kai hmuhchhuah an awlsam zawk dawn vang a ni tih a sawi a. "Ni 14 hi a tha thaw khata ngaih a ni a, mahse quarantine centre an luh hnua kai te an awm thei a. Ni 14 chhunga lang lo a awm theih avangin ni 21 chu huam kim zawkah kan ngai a ni," a ti a. "Veng thenkhat quarantine centre a ni 14 an awm hnua ni 7 chhung lo khung hrang an awm bawk a, heng zawng zawng khairual nan hian ni 21 a tihpunmai hi a remchangin kan hria a ni," a ti bawk.

Dr.Rosangluaia chuan inkhunghran hun chhung ni 21 tih anih chuan sample lakkhawm leh test hun chhung pawh a rei zawk dawn a, tuna back log awm hi a ziaawm dawn tih sawiin, "Veng tam takin PCR test ngei an duhna leh khunghran te pawhin an test result hriat ngei an duhna kawngah a pui dawnin kan hria a ni," a ti bawk.

Mizoramah Covid 19 chu mipuiah a la darh lo nia an hriat thu sawiin, "Tun dinhmunah chuan kan la him thawkhatah a ngaih theih a, test hi han ti tam se kan dinhmun dik tak chu a hriat dawn a. Tuna a vei an hmuh te pawh quarantine mek te an nih avangin an hun takah an hmu ah ngai ila, vantlanga darh (community spread) hi chu a la awm lo ah kan ngai a ni," a ti.

Covid 19 inkaidarh dan chu kan hre tlangpui tawh na chungin mi thenkhat fimkhur tawk lo an la awm thin chu a pawi tih sawiin IMA President chuan, "Hmaituamna vuah te hi midang kaidarh tur venna tha tak a ni chungin vuah tha duh lo leh peih lo kan la awm thin te hi a pawi hle a. Hei bakah midang nen inawm hnaih loh (social distancing) hi a har viau chungin hri laka kan himna tur anih avangin kan uar thar leh a tul a ni," a ti a. A tlangpuiin Mizo mipui ten thu an awih nia a hriat thu a sawi bawk.