Aizawl : Northeast Initiative Development Agency (NEIDA) chuan nimin khan Tlabung Area chhunga Covid-19 vanga harsatna tawk chhungkaw 100 hnenah tanpuina an hlan.

Tanpuina thilpek hi Pu Thangkhuma (Chairman, Tlabung Village Level Task Force) leh Pu B.Lalhuthanga (Secretary, Khawthlang Tuipui Group YMA) te hnenah silpauline 100, Buhfai bag 104, Aloo Bag 10, Tel box 17, daal bag 10 leh chini bag 16 te chu Pu ZD Liansangzela - NEIDA TATA TRUSTS Lunglei District Coordinator chuan a hlan.

NEIDA hian YMA nen tangkawpin nikum fur laia Tlabung Area chhunga tuilian tuarte tan tanpuina engemaw zat an lo hlan tawh a, NEIDA TATA TRUSTS hian Mizoram Sawrkar hnenah PPE 2040, KN 95 Masks 16500, Medical Goggles 1000, Surgical 3-layer masks 12000 leh Shoe Cover (Setrile) 1000 te hlanin, hun hmasa lamah Hand Sanitizer liter 2200, Ventilator 5, PPE 2000 leh Surgical Gloves 22000 leh Surgical 3-layer Masks 10000 an lo pe tawh bawk a ni.