Nikum 2019 kum tawp lam atangin China-ah hripui chi khat Coronavirus a leng tan a, he hri hian khawvel pum a tum a. India ram pawh kumin February thla vel khan rawn lutin mi nuai 61 chuangin an kai tawh a, mitthi pawh mi nuai 1 an tling teuh tawh hle. Hripui hian eng chen nge min la chamchilh dawn a, mi eng zatin nge kai ang a, mi eng zatin nge thihpui ang tih hriat a la ni lo.

Hripui Covid-19 laka kan him nan sawrkar laipuiin March ni 22, 2020 a mipui pawn chhuah loh ‘Janata curfew’ a puan tuk March ni 23 atangin Mizoram chuan inkharkhip ‘lockdown’ a kalpui tan a. India ram puma lockdown neih tan March ni 25 aiin Mizoram chu ni 2-in a hmasa zawk a ni. March ni 25, 2020-ah Mizorama positive hmasa ber hmuhchhuah a ni a, hei hian mipui a ti ralkhel a, inkharkhip pawh khauh leh zuala kalpui a ni.

Inkharkhip vanga pawnchhuah khap a nih avangin a bik takin ni tin inhlawhten an tuar nasa zual a, chaw leh ei tur dangah te an buai phah hle. Hetih lai hian khua/veng hrang hranga task force te chuan an khua/veng chhungah chhuanchham leh mi harsa an awm em tih enfiah hna an thawk a. Buhfai leh ni tin mamawh an pek bakah zonun zemawi lantirin mi tam takin harsa te tanpui hna an thawk bawk.

Hrikai an tlem avangin lockdown thlah dul a ni a, state pawn atanga lo haw te ah hmuh an nih leh tak avang te, tunhnaiah vantlangah a darh ta hial nia mi thiamten an ngaih avangin a khat tawkin Aizawl khawpuiah chuan inkharkhip hi neih leh thin a ni. Heng hun harsa kan tawh lai te hian Mizo nih a nuam a, upain ‘Sem sem dam dam, ei bil thi thi’ tih an lo nunpui tawh thin kha a takin mi tam takin an lantir a, an la lantir leh zel dawn ni pawhin a lang.

Hripui hi a bik takin Aizawl khawpui in a tuar nasa zual a, buhfai leh nitin ei chawp dang alu, dal, tel leh thil dangte chu phailam atanga chawkluh ni mah se thlai thar erawh a lo luh thin loh avangin mipui an buai hle. Veng hrang hrang Local Level Task Force (LLTF) ten Aizawl khawpui chhehvelah thlaihnah leh thlairah te dap khawmin veng mipuite hnenah an hralh leh chhawng a. Aizawl khawpui harsatna hi hria-in khaw tam tak chuan chawhmeh a thlawnin an pe bawk.

Tun hnaia lar tak pakhat chu ‘quarantine’ tih tawngkam hi a ni. Hri kai an awm chuan an damloh dan a zirin Zoram Medical College emaw Covid Care Centre (CCC)-ah te dah thin an ni a, an chhungte pawh fimkhur thilah pawn chhuak lo tura tih ‘home quarantine’ an ni thin. Covid vei damlo pakhat chuan CCC an awm laiin hmun hrang hrang atangin eitur leh thilpek chi hrang hrang an dawng thin tih sawiin Zonun zemawi a lang thin chu ropui a tih thu a sawi a. Home Quarantine a awm pakhat pawhin khung hran an nih chhungin thenawm khawvengte atangin thlai leh sa chi hrang hrang an dawng thin niin a sawi a, ropui a tih thu Zalen a hrilh. LLTF hruaitu pakhat chuan khawvel leh Mizoramin hripui vanga harsatna a tawk chu hreh-awm hle mah se, Mizo nun zemawi tlawmngaihna lanchhuah tirtu anih avangin lawmawm a tih thu a sawi ve bawk.