Aizawl : Nimin khan India zalenna champha, Independence Day tum 74-na niin India ram hmun dangte rualin Mizoram dung leh vangah pawh lawm a ni a. Mizoram chhunga Independence Day lawmna programme lian ber chu Sipai Lammualah Aizawlah nimin zing dar 8 khan neih niin Chief Minister Zoramthanga chu khuallian a ni.

Chief Minister chuan Mizoram mipui te, ram chhung leh ram pawna India khua leh tui zawng zawngte Independence Day chibai a buk a. Independence Day kan hman mek lai hian kan beisei loh lam atangin min runtu hripui hlauhawm chuan ram pum a tuam mek thu sawiin, kan him tlanna tura inkaihhruaina dante leh mi thiamte thurawn ngai pawimawh a, kan zawm tlat chuan he hripui lakah pawh kan him zel ang tih a beisei tlat thu a sawi a. “Lirnghing, ruahpui, lei min leh tuilianin India ram hmun hrang hrangah harsatna a thlen a; Mizoram pawh kan bang chuang lo. Khuarel chhiatna avanga in leh lo leh rohlu chan te; nunna hial chanta te ka tawrhpui tak meuh a. Sawrkar laipui, state sawrkar leh pawl hrang hrangin heng kan harsatna tawh mek te sukiang tur hian theihtawp an chhuah reng a ni,” a ti.

Chief Minister chuan Covid-19 chung-changa Mizoram sawrkar hmalakna hrang hrang sawiin, he hri leng veng tura sawrkarin rua-hmanna a siam hrang hran te, Mizoram chu India ram pum huap anga pawhin kawng tam takah hmahruaitu a nih thu a sawi.

State pawn atanga tangkhangte hruai haw an nih dan leh an awmna tur buatsaih a nihna kawngah tlawmngai pawl leh task force hmalakna chu chhuanawm a tih thu a sawi bawk.

Chief Minister’s Relief Fund-ah COVID-19 hri leng dona kawnga sawrkar tha tichak turin mi inphal leh thahnem-ngaite – mi mal, pawl, kohhran leh sawrkar hnathawk pawl hrang hrangte chungah lawmthu a sawi rualin sum tlingkhawmte hi tangkai taka hman a nih thu a sawi bawk.

June 21 atanga lirnghingin Mizoram vawi tam tak a sâwi chungchang pawh sawi langin, heng lirnghingte avang hian Champhai district chhungah nasa takin chhiatna a thlen thu leh nunna chân awm lo mah se, chenna in 283 leh thil hlu tam tak a chhiat thu leh heng thil chhiate hlut zawng belhkhawm hi cheng nuai 316.35 ang vela chhut a nih thu a sawi.

Socio-Economic Development Policy (SEDP) chu hlawhtling taka kalpui an tum thu a sawi. Mizoram hmasawnna turin ki peng pawimawh tin hawlkimin, Mizoram chu state intodelh, a rama cheng mipuite khawsak changkang leh khawtlang nun nuam a siam dawn a ni, a ti.

Horticulture hnuai-ah Lengpui leh Hmunpui khuaah te Model Bamboo Plantation a siam a nih thu sawi langin, hemi hnuaiah hian hamthatna dawngtu mi 209 an awm thu leh mau tiak 79,000 phun tawh tih a sawi. COVID-19 avanga inkhuahkhirhna khauh taka kalpui a nih chhungin Horticulture Department, Commerce & Industries leh MIZOFED chu Sawrkar din Vegetable and Fruit Supply Chain mawhphurtu an ni a. Lockdown hunlaia thlai leh thei hralh-chhuah leh dehral zat hlutna hi cheng vaibelchhe 6.66 vel a nih thu a sawi lang bawk.

Chief Minister hian sawrkar department hrang hrang te hmalakna hrang hrang a sawi a, chhuanawm a tih thu sawi langin hmasawnna rahbi pawimawh tak a nih thu a sawi. Kumina dan bawhchhiatna lian tham sawi tur a awmlo hi kan police te hnathawh thatzia tarlangtu pawimawh tak a nih thu a sawi a, police mi 3,000 vel lai chu tha thlah lovin COVID-19 kaih-hnawih hna pawimawh chi hrang hrang ramri ven, contact tracing, quarantine facility hrang hrang venhim te an thawk mek thu a sawi bawk.

Zoramthanga chuan, "COVID-19 hripui leng do kawnga tun thlenga theihtawp chhuahtu sawrkar hnathawk te, Village/Local Task Force, kohhran leh tlawmngai pawlte, police leh sipai te chungah lawmthu kan sawi a. He hun khirh tak kan tawn laia a ral hmatawnga awm - kan damlo enkawltute, sample la a fehchhuak thinte leh laboratory hrang hranga rim taka chawlh pawh nei lova sample test hna thawktute leh COVID-19 Volunteer te chungah a bik takin Zoram mipuiin lawmthu kan sawi a. Mipui kan him tlan theihna tura CM Relief Fund-a phal taka sum thawhtu zawng zawngte hnenah lawmthu ka sawi tak meuh bawk a ni," a ti.

"Mizoram NGO, kohhran leh mipuite chungah kan sawrkara rinna in nghah tlat avang leh min thawhpuina avangin lawm thu ka sawi a. Vawiin hian, zalenna sualtu mi huaisen leh kan ram siamtute hmathlir chawi nung a, vawng him a, tipuitling zel turin inhlan thar leh ila, an thisen leh thlantui a thlawnin i luan raltir lo ang u. Khawvel pum thlirin, inrikrapna leh indo thuthang te, ralmuan lohna chi hrang hrang kan hria a, Mizoram hmasawnna bakah, remna leh muanna vawng nung zel turin rim tak leh huaisen takin hna i thawk zel ang u," tiin mipui a chah.

Lammual programme-ah hian sawrkar hnathawkah pawh department director leh a tlukpui chin chunglam chauh sawm an ni a. Guard of honour pe tur armed forces contingent 5 (3rd bn. MAP, 46 Assam Rifles, 90 Bn BSF, Mizoram Home Guards, 5th IR Bn) leh Band Party pakhat (1st Bn. MAP Brass Band) an tel a ni.