Aizawl: November ni 13, 2020 khan Mizoramah COVID-19 positive thar 59 hmuh chhuah an ni. Bihar inthlanpuia duty IR-te zingah Covid 19 hri vei zat chu an vaiin 67 an tling tawh.

ZMC RT-PCR Laboratory-ah sample 575 (mipa 351 leh hmeichhia 224) test niin COVID-19 positive 17 hmuhchhuah an ni a, mipa 11 leh hmeichhia 6, kum 11 atanga kum 62 inkar an ni. District hrang hrang TrueNAT Laboratory-a sample 125 (mipa 104 leh hmeichhia 21) test zingah COVID-19 positive hmuh chhuah thar mipa hlir 14 an awm a, Bihar Election-a duty haw vek an ni.

Rapid Antigen Test hmanga COVID-19 positive hmuh chhuah thar 28 an awm a, mipa 23 leh hmeichhia 5 niin, mipa zinga 22-te chu Bihar Election-a duty haw an ni a. TrueNat hmanga hmuh 14-te nen nimin bika positive hmuh chhuah zinga 36-te chu Bihar Election duty haw an ni. ZALEN thudawn danin Bihar inthlanpuia duty IR-te zingah Covid 19 hri vei an vaiin mi 67 hmuh an ni tawh a ni.

Mizorama Covid-19 positive hmuh tawh zawng zawng chu 3,368 an ni a, dam tawh mi 2,792 awmin enkawl mek 573 an awm a, Covid 19 vei tihdam tawh zat (recovery rate) hi 82.89% an ni.

District hrang hrang dinhmun chu Aizawlah vei mek 482, dam tawh 1890, thi 3, Lungleiah vei mek 13, dam tawh 282, Siaha ah vei mek awm lo, dam tawh 32, Champhaiah vei mek 7, dam tawh 57, Kolasib ah vei mek 6 dam tawh 252, Serchhipah vei mek 7 dam tawh 87, Lawngtlaiah vei mek 32, dam tawh 97, Mamit ah vei mek 12, dam tawh 59, Khawzawlah vei mek 11, dam tawh 7, Hnahthialah vei mek 1, dam tawh 13, Saitualah vei mek 2, dam tawh 16 an awm a ni.