Aizawl; Chief Minister Zoramthanga chuan, “Hriselna atana tha lo chi hrang hrang kan neihte hi kan tlansan ngama indo kan puan a ngai tawh a ni,” a ti.

Tuipuiral Zirlai Pawl (TZP) Gen. Hqrs., Aizawlin nimina Fresher’s Social 2022, Chanmari YMA Hall-a an buatsaih a hmanpuinaah chief minister chuan zirlai kalkhawmte chu zu, ruihhlo leh vaihhlo kaihhnawih laka fihlim turin a chah.

Cancer vei tam zawnga India state a kaihruaitu nihna hi thlak dawn a nih chuan hriselna atana tha lo chin hrang hrang tlansan ngama indo kan puan a ngaih tawh thu a sawi a. Nih theih leh tih theih turte ni thei lo, ti thei loa mi siamtu a ni tih hre renga nun uluka invawn a pawimawh thu a sawi.

Chief minister chuan TZP-ten an bial chhung hmasawnna ngai pawimawha an hmalakna chu lawmawm tiin, hmawsawnna ruhrel din pawh a tul leh mamawh angin sawrkarin theihtawp a chhuahpui zel tur thu a sawi.

Khualzahawm bialtu MLA Ramthanmawia pawhin zirna in hma a sawn theih nana kawng hrang hranga sawrkarin hma a lak dan leh a bik takin a bial chhunga zirna hmasawnna kawnga TZP te tawiawmna chu lawmawm a ti a. Mi entawntlak tak tak leh eizawnna kawnga chhuanawm tak tak an lo chhuak zelte chu lawmawm tiin, hmasawnna hmuh zel a beisei thu sawiin thalai kalkhawmte hnenah chuan an awm dan leh Pathian thu lo inmawi zel se tiin a chah a ni.

Tuipuiral Zirlai Pawl te hian HSLC leh HSSLC exam 2022 a an bial chhung atanga distinction a pass mi pali te hnenah MLA award an hlan a, bialtu MLA chuan laptop a pe a ni. Undergraduate exam a rank holder te hnenah lawmman pek ni bawkin, rank holder pali an awm a. Anni bakah hian zirna sang zawka hlawhtinna changte hnenah lawmpuina hlan a ni bawk.