Huaisena taka theihtawp kan chhuah chuan kan sawrkar ngei ang - Congress President
![](/storage/news/post/2r6cG3jTYzldlqfiaFM7SGtOSFBLgwjfScwYPnkw.jpg)
Aizawl May 31, 2023 : Vawiin khan Lal Thanhawla Auditorium-ah Aizawl District Congress Committee (ADCC) huamchhung Block Leaders’ Conference neih a, thusawitu MPCC President Lalsawta chuan Huaisena taka theihtawp an chhuah chuan an sawrkar ngei tur thu a sawi. he hunah hian MPCC Spokesman Dr. Lallianchhunga chuan ‘Tang Puihna’ sawifiahna neiin, ‘Tang Puihna’ Video tawi tlangzarhna a ni bawk.
Lalsawta chuan, "Keini hi Kum 2018 kan tlak hnu atang khan lawm viauna tur chhan kan nei lo chungin, sawrkar ta ila sawrkar tha kan din dawn tih kan hriat avangin nghet takin Congress tan kan ding a ni. Rinawm taka kan din ngheh tlat avangin mi tha tak tak Congress-ah an lo lut tawh a, mi tha tak tak ten min rawn la belh zel dawn a ni. Heng mi ropui leh hmingtha te hian rawn luh duh chhan an nei a; chu chu kan Party Policy-ah hian mipui an lal ber thin a, tunah pawh hian an lal ber dawn nia an hriat avang niin kan hria a ni. Huaisen taka theihtawp kan chhuah chuan kan sawrkar ngei dawn a ni," a ti.
MPCC President chuan, “Congress Party chuan inthlan a pawisa chakna tih bo hi kan tum tlat a, kan tum chhan chu keini aia rethei leh zual zawk te tan a thawk tur kan nih avang a ni. Ram siam that kan duh chuan he thil hi kan tih ngei a ngai a, kan hotute pawhin candidate te ti hautak lo zawng a ruahmanna kan siam a tul tak zet a ni” a ti bawk.
Lalsawta chuan, “Politics a kan awm chhan hi thil tha tih a ni a, kan thil tha tih tam tak zingah Dr. Lal Thanhawla ho a kan din Falkawn Referral Hospital leh Tuirial Hydel Project ringawt pawh hi ropui tak a ni. Congress Party hian thil tha tam tak kan ti tawh thin a, kan thil tha tih te hi kan sawi uar ve pawh a tul hle a ni. Chung zawng zawng chu Congress Party in lo thlan tlin thin tawh vang a ni a, in zar liau liau a ni,” a ti.