Pathianni hi kum 2005-a na taka New Orleans nuaitu, Hurricane Katrina a thawh champha chiah kha a ni a, hemi niah hian Ida hi a thlen leh hmel hle.

Katrina hi khawmual a kai hian category 3-a chak niin khawpui 80% chu tuiin a chim a, mi 1,800 chuangin an thih phah.

Ida pawh hian Cuba leh US-ah chuan tui a titam dawn hle niin khawchin zirtute chuan an sawi lawk a. Mi thiamte chuan tuifawn san hun nen a innan dawn avangin New Orleans-in tuifawn dalna a siam chu liamin khawpuiah tui a thei dawn hle niin an sawi lawk.
New Orleans levee system an tih hi khawpui hmun hniam deuh laia tuipui luang lut tur danna bang siam a ni a, kum 2005-a Katrina an tawrh hnuah tha zawkin an siam nghe nghe.

Governor Bel Edwards chuan emergency a puang a, an state-a vaukama cheng, him tawk lova awmte chu Inrinni tlai atangin insaseng turin an hriattir.

White House pawhin a ngaihven reng a, sorkar laipui atang pawhin puihna tur ang chi awm thei atan an inring reng tih an sawi.

Hurricane Ida-in United States-a Louisiana vaukam a hrut dawn avangin New Orleans mayor pawhin khawpui daia cheng, him lo deuhte chu hmun him zawk pan turin a ti.

“Tun hi chet hun a ni,” tiin Mayor LaToya Cantrell chuan Zirtawpni (India-a Inrinni tuk)-a thuthar lakhawmtute a kawmnaah a sawi.

National Hurricane Center (NHC) chuan Ida hi a thawk na dawn hle nia sawi lawkin an ram huna Pathianni (India-ah Thawh\anni zing/chawhma)-ah khawmual a kai dawn niin an sawi.

Cuba-ah ruah tam tak leh thli na tak a thlen tawh bawk.

Sik leh sa inthlak nasa lutukin hetiang hi a thlentir tam zual tih chu finfiahna tak la awm lo mah se tuipui a lumin a chung lama boruak awm a tilum a, hei hian chakna pe nasa zualin hurricane, cyclone leh typhoon a tiinsiam hma niin mi thiamte chuan an sawi.

Khawchin zirtute chuan hurricane hian Gulf of Mexico hmar lam vaukama Pathiannia khawmual a kai lai hian category 4-a chak  a ni dawn tih an sawi lawk.

“Inbuatsaih lawk lo tan chuan nunna atana hlauhawm khawp a ni ang,” tiin National Weather Service meteorologist Benjamin Schott chuan a sawi tih Associated Press chuan a tar lang.

Gulf of Mexico-a tuialhthei laih chhuahna leh sawngbawlna hmun 80 chuanga awmte chu hmun himah suan an ni a, heng lai hmuna tuialhthei leh gas lak chhuah \hin zahve vel tihtlem a ni bawk.

Ida hian Zirtawpni khan Cuba khawthlang lam, Isle of Youth chu darkar khata km 120-a chak thlipui kengin a nuai tawh.