January 31, 2024; Hyderabad Mizo Association (HMA) in an pawl kalphung leh Hyderabad pan tum Mizote hriattur an puang... 

HYDERABAD MIZO ASSOCIATION

PRESS RELEASE

Hyderabad Mizo Association hi Hyderabad khawpui huamphâk a Mizo awmte a ṭul ang leh mumal taka

kan inenkawl theihna atâna ding a ni a, Hyderabad-ah hian chhan hrang hrang avangin kan lo chuangkai

a, kan kal chhan a dan ang zêlin kan harsatna tawh pawh a inanglo thei hlawm viau ang. HMA hian a

theih chin chinah kan Mizo unaute ṭanpui leh chhawmdâwl kawngah a ṭuldan azirin hma a la thin. Hun

lokal zêlah kan inkaihhruai leh enkawl dân kawngah memberte infuih thar leh a ṭûl niin a hria a, heng a

hnuaia mite hi HMA huang chhûng inenkawlnaa kan lo hriat tlân atân kan han târlang a ni e.

1. Hyderabad khawpui lo chuang chhuak tur rêng rêng chuan kan kal hmâin kan kalna tur zirna emaw hna a ni emaw, a lo awmsa te aṭanga information mumal tak neih hmasak tum tur a ni. Tunlaiah inbumna hrang hrang a tam tawh avangin heng laka kan fihlim theihnân kan kalna tur hmun hi zirchian ngei ni se; hemi atân hian Zirna in hrang hrangah Zirlai biakpawh tur pawh kumtin siam ṭhin niin, hnathawk turte pawhin lo thawksa emaw hruaitute emaw biakpawh theih reng an ni.

2. Engvang pawha lokal kan nih chuan chhiatni ṭhatni a kan belh theih turte zingah ngampa ngei turin kan inngên a, mahni tlat tlata tla mailo leh hnamdang zînga pilbo mai lo turin kan inngên a, chutiang bawkin a lo awmsa an rawn belhten kan unau lokal tharte enkawl kawngah mumal taka an chanchin hriatpui te pawh lo tum ṭhin turin kan inngên a ni.

3. HMA hian Hyderabad a Mizo awm zawng zawng te a huam rûalin mahni duhthu ngeia pâwl zawmlo te chu enkawl leh chhawmdâwl a tum lo a, hei vâng hian pâwl member a inziak lut, Membership registration ti te chauh a huam a ni. Member Registration ti kan nih chuan pâwl

inkaihruaina dân te, pâwl hmalâkna te kan pawm tihna a ni a, member awmṭha duhlo leh zilhhau tâwk, zilhhauna zâwmlo te chu member annihna hlihsak theih an ni a, chutianga member nihna hlihsak leh mahni duhthu ngeia pâwl member nilo chuan hun dangah pâwl hmalakna leh ṭanpuina an beisei theilo ang.

4. HMA hian ram leh khawtlâng dân bawhchhe zâwnga chêtna rêng rêng a do tlat a, chutiang kawnga hming lang theiah; Zu leh ruihtheihthil a inhnamhnawih avanga buaina te, rûk rûk leh sum leh pâi kaihhnawih inbumna a inhnamhnawih avanga buaina te, an hna leh zirna kawnga kan chêt felloh avanga buaina te, mimal leh mimal inkâra inhmuhthiamlohna chhan mumal lo; ngaihzâwng thuhla, insual buai thuhla angah te Hyderabad Mizo awmte inhnamhnawih lo turin kan inngên a, heng ang chi buainaah hian pâwl hmalâkna beiseilo turin kan inngên a ni.

5. Mimal leh pâwl, ram leh hnam anga kan ṭhat tlân zâwkna tûra a hriatah chuan HMA hian hmalâkna a nei thei a, hei hian member kherlote pawh a huam thei. Chutianga hmalâkna rêng rêng chu ngaipawimawhlo leh bengkhawn duhlo emaw kan awm anih chuan dân leh thupêk kengkawhtu te hnên thlen pawh a ṭul châng a awm thei. Chutiang ang dinhmun thlenglo a kan inchinfel tlân hi HMA chuan a duh reng dawn a, chutiang thlen ngailo a kan unaute pawh awm turin kan inngên a ni.

HMA dinchhan ang taka ṭanpui ngai, harsatna tâwk kan awm chuan ṭanpuia, pênchhuak tûrin Hyderabad

Mizo te kan inpeih a ni tih kan hre ṭheuh dâwn nia.

 (HZ SIAMA) 

General Secretary 

(SAMUEL L RALTE)

President