Aizawl August 16, 2024 : Major Laldingngheta S/o Vanlalhriata, Bungkawn Vengthar, Aizawl chuan Jammu & Kashmir a terrorist nen inkahnaah a chetthat avangin Independence Day khan India sipai huaisen chawimawina tangkapui, Sena Medal (Gallantry) a dawng.

Maj. Laldingngheta leh a kaihhruai Combat Action Team te hian Oct ni 21,2023 tlai lam dar 3 velah Intelligence report an dawn chu bawhzui nghalin Line of Control rawn kan mek terrorist 4 an hmu a. Terrorist rawn kal na tur ah ruang chaicheh thlak turin Ambush an lo siam a. Hual chhunga terrorist an rawn luh veleh Maj Laldingngheta team te hian lo kap nghalin he inkahna ah hian Maj Laldingngheta hian terrorist pakhat a kaphlum phawt a. Hel hovin an rawn kah letna ah Maj Laldingngheta hian a mit dinglam ah Grenade puak vanga hliam a tuar a.

A banpuam dinglama kah fuh anih bakah a chuap bawrah grenade puak in a per bawk a. A lu-ah hliam tuar bawkin grenade puak them pathum laiin a thluak a pawh a ni. Hetiang khawpa hliam nasa tuar chung hian zam hauh lovin a nau te tha taka control in an inkap chhunzawm ta zel a. Terrorist la dam te erawh Line of Control lama tlan let lehin Maj Laldingngheta hian a mimal himna leh hlauhawm pawh ngaihtuah lovin, a team te himna tur dah hmasa zawkin terrorist tlan chhia chu a umzui a. Terrorist pakhat chu va nangching lehin a kaphlum leh a ni.

He inkahna ah hian Maj Laldingngheta hian terrorist pahnih lai a kaphlum a, a hliam te a nat tham deuh avangin rang takin 92 BH, Srinagar lamah helicopter a phurh phei nghal a ni a. Chumi zawh ah R&R Hospital, Delhi lamah sawn leh niin hetah hian a dam that thleng an lo enkawl zui ta a ni.

He operation a huaisen tak leh a team te himna tur a ngaihtuah avang te, Pakistan atanga terrorist rawn lut tur a lo dan avang te leh terrorist pahnih lai a kahhlum avangin India sawrkar chuan India sipai huaisen chawimawina tangkapui, Sena Medal (Gallantry) hi India Independence Day vawi 78 naah a hlan ta a ni.