I Day Football Tournament 2022 khelh mek chu an inthlifim chho zel a, mipa leh Veteran lamah team 4 ve ve chiah dam tawhin naktuk hian R.G. Stadium-ah leh A.R Lammualah semi-final an khel ang. 

Vawiin I Day Women Football Tournament 2022 semi-final khelhah Govt. Central HSS (College Veng) chuan Marcus School of Education (Maubawk) si hnih faiin an hneh a, New Vision Academy ( Electric Veng) awhin Govt. Hrangchhuana HS (Ramhlun North) te sihnih faia hneh bawkin final an lut a, final hi Independence Day, August ni 15, chhun dar 12-ah khelh a ni ang. 

Vawiin lam khan R.G. Stadium-ah Veteran quarter-final khelh niin match hmasa zawkah G 90's ten 6-0 zetin NEHU Alumni an sawp a, match hnihnaah Chanmari Veteran chuan Venghnuai Veteran 2-0 in an hneh bawk. Naktuk August ni 11 hian RG Stadium-ah semi-final khelh chhunzawm a ni dawn a, chawhma dar 11-ah Mizoram Police leh Ditea's United ten an khel dawn a, semi-final match hnihnaah G90's leh Chanmari Veteran ten chawhnu dar 1-ah an khel ve thung ang.       

Naktuk vek hian AR Lammual lamah mipa semi-final khelh a ni dawn bawk a, chawhma dar 11:30-ah FC Venghnuai leh Mizoram Police FC ten match hmasa zawk an khel dawn a, chawhnu dar 2-ah Chhinga Veng FC leh Aizawl FC ten semi-final match hnihna an khel thung ang.