ZALEN February 23, 2025 : Indian Air Force (IAF) hnena Lengpui Airport hlan dan tur chungchang zir chiang mektu, Working Committee on Lengpui Airport-in draft memorandum of agreement (MoA) an buatsaih hun chhung chu chhan hrang hrang vangin pawh sei a ni.

TBC Lalvenchhunga, Adviser to Chief Minister (Finance & Planning), Working Committee on Lengpui Airport-a an chairman hnen atanga ZALEN thudawn danin IAF kuta Lengpui Airport hlan chungchanga thil pawimawh hmasa, MoA chu working committee lamin an buatsaih mek a, hetihlai hian village council leh local council inthlan vangte-in sawrkarah an buatsaih hun chhung pawh sei an dil a, an dil anga pawh sei niin May 27, 2025 thleng hun pek an ni.

Ruahmanna hmasaah chuan MoA hi thla thum, February, 2025 hma a peih fel tur a ni.

Working committee hmasain state sawrkar hnena Lengpui Airport enkawl zui zel dan tur chungchanga report a thehluh chu October 16, 2024-a cabinet meeting-in a thuphungin a pawm a. Cabinet thutlukna bawhzui zel tur hian state sawrkar chuan working committee a din thar leh a ni.

State sawrkarin ‘Terms of Reference’ a siamsak angin committee hian IAF hnena airport hlan dan tur chungchang a zir chiang ang a. IAF nen indawr zui zela draft memorandum of agreement thlenga ruahmanna mumal tak siam tura tih an ni.

Tar lan tawh thin angin IAF kuta Lengpui Airport hlan tumna hi eptu party-te chuan na takin an dodal a, Mizoram Pradesh Congress Committee (MPCC) hruaitute chuan hlan lo turin Mizoram sawrkar an ngen tih an lo puang tawh.

February 8, 2025-a Lengpui Airport an tlawhnaah MNF Legislature Party Leader leh Leader of Opposition Lalchhandama Ralte pawhin Mizoram sawrkarin IAF kuta airport a hlan a nih chuan ram mipuite pawi an khawih dawn tih a sawi.

NGO Coordination Committee (NGOCC) Mizoram hruaitute pawhin February thla tir khan Chief Minister Lalduhoma an hmu a. Mizoramin airport a neih chhun IAF kuta sawrkarin hlan a tum chu ngaihtuah nawn turin an ngen a. NGOCC hian August 9, 2024 khan airport hi IAF kuta hlan kan remti lo tiin thuchhuah a lo siam tawh bawk.