ZALEN Febuary 17, 2025 : Adviser to Chief Minister TBC Lalvenchhunga chuan, “Mizoram sawrkar hian IAF kutah Airport kan pe dawn lova, kan ramin a hlawkpui theihna tur leh changtlung zawka siam kan tum mai a ni. Ram siamthat kan tumna kawngah Administrative Reform huai takin kan kalpui mek a, hun rei lote chhunga kan hnathawhte avangin sawrkar laipui atangin beisei phak loh sum tam tak kan dawng tan mek a ni,” a ti.

ZPM pary chhung inkhawmah TBC Lalvenchhunga chuan, “Tunlaia lar em em Airport chungchangah hian a mimal pawhin min bei nasa hle a, Lengpui Airport hi naktuka hlan mai tur niawm tak hian kan rilruah a awm deuh niin ka hria a, mithiam tak tak te nen zirchianna hrang hrang kan nei a, Wing Commander Pu J Lallhmingliana hi kan zirchiannaa kan thawn hmasa ber a, min chhanna chu Airport kan enkawl zawh loh thu leh AAI-in a dratf an neih ang hi IAF atangin nei ve phawt rawh u,” tiin thurawn min pe a ni. A thurawn anga an kal mek lai chuan a ni lo zawngin media hrang hrangah te an sawi ta tiin, Wing Commander senior dangte leh service lai mekte pawh an rawn nasa tih a sawi bawk.

Adviser to Chief Minister chuan, "Vawiina IAF kuta Airport hlan duh lotute hian kum 2011-ah ram Acre 32 zet mai Jet Fighter thuhrukna tur an lo pe tawh a ni. Kum 2022-ah AAI-in Mizoram sawrkar-ah MoU draft a rawn thawn leh a, khatihlaia sawrkar MNF ten an tihpuitlin hmain sawrkar a inthlak chho zui ta mai zawk a ni. Chuvangin ZPM sawrkar hmalakna a ni bik lova, party pahnih sawrkar tawhte hma lo lak tawhna kan bawhzui mai a ni."

"Airport hi hralh kan tum lova, hlan kan tum hek lo. IAF kaltlangin changtlung zawka siam theih dan kan dap mek a ni. State danga mipuiten IAF Airport an va tawm zawk ang kha ni lovin Lengpui-ah chuan kan airport min rawn tawm ve zawk dawn tihna a ni ber. Kum 2019 leh 2022 ah khan IAF hnenah Lengpui-ah acre 97-a zau leh Sihphir-ah acre 5-a zau MNF sawrkar khan No objection an lo pe fel vek tawh a, tun dinhmunah a hlau ber anga an rawn au leh si hi a mak hlein ka hria,” a ti.

TBC Lalvenchhunga chuan, “Mizorama ZPM-a awm hnuah danglamna nasa tak a thleng a, inthlan leh a vuakvet a felfai a, ruaitheh leh lawmna siam mup mupte a bova, tuna Local Council inthlan kan zawh takah pawh Party naupan ngaihtuahin hma kan sawn em em a, Local Council leh Village Council-a seat tlemte nei ve chauh kha tunah chuan a sang berah kan awm tawh a ni. Ka bial chhungah pawh VC leh LC member kan nei mang lo, mahse tunah chuan member 47 zet kan nei tawh a, kan vote share phei chu party upa zawkte pahnihte aiin a sang hle a, hma kan sawn tak zet a ni," a ti.

TBC-a chuan, “ZPM chuan Year of Consolidation kan puang a, Austery measure kan la bawk a, department hrang hrangte sum leh pai hman dan budget kan present dawn a, a rawn lang dawn a ni. PWD-a hma kan sawnna te hi a lawmawm ka ti a, Finance Minister leh CM ni bawkin kan ram kawngte a vei em em, sum an mamawh angte an department budget piah lam vaibelchhe 180 vel pek belh an ni a, an kawng siam pawh tun hma ai chuan a tlo turah ka ngai."

"UD&PA-in kum khat chhunga Reform target an thawh that em avangin Vaibelchhe 300 Cr. kan dawng a ni. Revenue-ah Vaibelchhe 15 kan dawng a, Finance Achievement avangin Vaiblechhe 250 Cr. dawn kan la inbeisei bawk a ni. Department hrang hrang thawh that chhan hi a enkawltu kan Minister te taimakna rah a ni a, kan Minister te an tang em em lai hian party mi te pawh mahni hamthatna chauh ni lova ram tan tang leh zual turin ka sawm che u a ni’ a ti bawk.